Qurban Məmmədovun Türkiyədə saxlandığı bildirilir

Bakı/17.09.20/Turan: Siyasi mühacir Qurban Məmmədov sentyabrın 16-da Türkiyədə saxlanılıb. Bu barədə onun oğlu Qoşqar Məmmədov Facebook səhifəsində məlumat verib.

“Qurban bəylə bütün əlaqələrimiz kəsilib. O, Türkiyədə saxlanılıb. Polis xüsusi təyinatlı dəstəsi onu aparıb. Onunla birlikdə olan tanışımız hara apardıqlarını heç cür aydınlaşdıra bilmir.

Digər tərəfdən, Bakıdan daxil olan məlumata görə, Türkiyəyə bir qrup gedib, Qurban bəyi saxlayan polislə danışıqlar aparıb. Onlar hətta mübahisə ediblər. Bundan sonra onu naməlum yerə aparıblar”, - siyasi mühacirin oğlu yazıb.

Qeyd edək ki, sentyabrın 8-də Baş Prokurorluq digər siyasi mühacirlər qrupu ilə yanaşı Qurban Məmmədova qarşı Azərbaycan CM-in 12.1, 34.2, 220.2 (kütləvi iğtişaşlara və vətəndaşlara qarşı zorakılığın tətbiqinə çağırışlar) və 12.1, 34.2, 281.2-ci (dövlətə qarşı açıq çağırışlar) maddələri ilə cinayət işi qaldırıldığını bildirib.

Nəsimi Rayon Məhkəməsinin qərarı ilə Q.Məmmədovun barəsində həbs qətimkan tədbiri seçilib.

Qeyd edək ki, Qurban Məmmədov Azərbaycanın bütün siyasi qüvvələrinə qarşı qalmaqallı fikirləri ilə tanınır. Hansısa yolla Böyük Britaniyaya köçən və orada sığınacaq alan Q.Məmmədov son illər bloger rolunu oynayıb və hər gün videomüraciətlərlə çıxış edib. O həm hakimiyyəti, həm də müxalifəti kəskin tənqid edib, və bunu qeyri-etik, təhqiramiz formada edib.

Sentyabrın əvvəlində hakimiyyətyönlü KİV-də Q.Məmmədovun hökumətdəki bir sıra yüksək vəzifəli şəxslərlə əməkdaşlığı barədə məlumatlar yayılıb. İddia edilib ki, Prezident Administrasiyasının keçmiş rəhbəri Ramiz Mehdiyevin və prezidentin keçmiş köməkçisi Əli Həsənovun himayəsi sayəsində Q.Məmmədov bahalı daşınmaz əmlaka sahib olub.

Bu yazılardan sonra Bakıda Q.Məmmədova məxsus beşmərtəbəli bina polis tərəfindən əhatəyə alınıb, kommersiya strukturları isə oradan çıxarılıb. Bundan başqa Q.Məmmədovun binanın üç mərtəbəsini tutan qohumlarının ailələrinə binanı tərk etmək təklif olunub. Bundan sonra qalmaqal səngiyib.

Müşahidəçilər hesab edirlər ki, müəyyən danışıqlar olub və nəticədə Q.Məmmədov Türkiyəyə gedib.

Baş Prokurorluq Q.Məmmədovun Azərbaycanın elan etdiyi axtarış əsasında saxlanılıb-saxlanılmaması barədə Turan-ın sorğusuna cavab verməyib.

Öz növbəsində, Q.Məmmədovun qardaşı Sərdar Cəlaloğlu Turan agentliyinə bildirib ki, bir neçə gün öncə Qurban Türkiyəyə gedəcəyini bildirib. Orada “yüksək səviyyədə görüşlər keçirəcək”.

“O, hüquqşünasdır və bilir ki, barəsində beynəlxalq axtarış elan edilib. O, Avropada sığınacaq alıb, ona görə də onun saxlanması və Azərbaycana verilməsi qalmaqala səbəb olacaq”, - S.Cəlaloğlu deyib.

*Qurban Məmmədov 90-cı illərin əvvəllərində Xalq Cəbhəsinin fəallarından biri olub. Daha sonra rəhbərliklə arasında mübahisə yaranıb və vəkillik fəaliyyəti ilə məşğul olub. Sonrakı illərdə iki dəfə mühakimə olunub və bir neçə il həbsdə qalıb.

Son üç ildə Londonda yaşayıb. —03D06-