Rafiq Cəlilov və doğmaları polisdən buraxılıb (YENİLƏNİB)

Bakı/12.06.18/Turan: "Talışon sado" qəzetinin ("Talışın səsi") baş redaktoru Rafiq Cəlilov və doğmaları iyunun 12-də günün ikinci yarısında polis şöbəsindən buraxılıb.

R.Cəlilov Turan-a deyib ki, onları beş saatdan çox Lənkəran polisində saxlayıblar.

Onun sözlərinə görə, polis qəzetdə dərc edilən materiallarla maraqlanıb, Avropada siyasi mühacirlərin yaratdığı "Oyan" hərəkatının simvolu olan qum saatının təsvir edildiyi yazılarla bağlı iradını bildirib.Bu yazıları etirazlara çağırış kimi qəbul ediblər.

Sonda R.Cəlilovu və ailə üzvlərini buraxıblar, onun avtomobilində olan qəzetin son nüsxələrini götürüblər. Eyni zamanda saxlanılan şəxslərlə nəzakətlə davranıblar.

Redaktorun və ailəsinin olduğu avtomobil günün birinci yarısında saxlanmışdı.-06D--

* * *

2018 İyun 12 (Çərşənbə axşamı) 17:22:36

"Tolışon sado" qəzetinin baş redaktoru Rafiq Cəlilov ailə üzvləri ilə birlikdə polisdə saxlanılır

Bakı/12.06.18/Turan: "Tolışon sado" ("Talışın səsi") qəzetinin baş redaktoru Rafiq Cəlilov saxlanılaraq Lənkəran rayon polis bölməsinə aparılıb. Sosial şəbəkələrdə yayılan bu məlumatı R.Cəlilov telefonla Turan agentliyinə təsdiqləyib.

R.Cəlilov deyib ki, maşında gedərkən polis avtomobili yolda maşının qarşısını kəsib və ondan maşından düşərək polisə getməsini tələb edib.

"Üç saatdır ki, polisdəyəm", - R.Cəlilov qeyd edib. Bu müddətdə ondan qəzetin fəaliyyəti ilə bağlı soruşublar.

Eyni zamanda R.Cəlilovun iki bacısını, qardaşını və hamilə qızını da polisdə saxlayırlar. R.Cəlilovun sözlərinə görə, onları Lerikdən Bakıya gedərkən yolda saxlayıblar.

Lənkəran polis bölməsindən şərh almaq mümkün olmayıb.

DİN-in saytında göstərilən telefon nömrəsinə cavab vermirlər.-06D-