Rusiyadakı 2 milyon azərbaycanlı 10 milyondan vicdanı kənara qoymağı tələb edir

Azərbaycanda martın ortalarında görünməmiş soyuqdur, temperatur mənfi on dərəcəyə enib. Dağlarda qışda olmayan qar yağır. Bir gün sonra Novruz bayramıdır. Yazırlar ki, bayram qış havası ilə bitəcək...

Soyuq Rusiya xalqının ürəyinə sızdı. Televiziyada rusların milli bayramı göstərilir, onlar ukraynalıların kədərinə sevinirlər, hərçənd bu yaxınlarda Putin ruslar və ukraynalıların bir xalq olduğunu demişdi. Melitopolda bomba teatrı darmadağın etdi, amma bomba yağdıran onun altında min beş yüz insanın gizləndiyini bilirdi. Lvova raket hücumu ilə bağlı məlumatlar var. İnternet Ukrayna yollarında dağıdılmış rus texnikasının kolonlarını əks etdirən şəkillərlə doludur. Ukraynalılar şir kimi döyüşürlər, əllərində olan hər şeylə döyüşürlər.

şəkil - Ukraynanın Sumı şəhərindəki stansiyanın tarixi

Rusiya mətbuatında baş verənləri başa düşülən və adekvat rus sözləri ilə adlandırmaq mümkün deyil. “Müharibə” “təcavüz”, “işğal” və digər sözlərə görə 15 il müddətinə azadlıqdan məhrum edə bilərlər. Əgər Rusiya qalib gəlirsə, niyə açıq danışmaqdan qorxursunuz? Sözlərin manipulyasiyasından nə fayda? Həqiqət qorxusu o dərəcədədir ki, Rusiya Federasiyasında iki Azərbaycan saytına – “Minval” və “Haqqın.az”a giriş bağlanıb. “Kavkazski uzel”, “Dojd” və digər Rusiya KİV-ləri də bloklanıb. Həqiqət haradadır? Putinin çıxışlarında? Rusiya o yerə çatıb ki, əksini düşünən hər kəs kameraya layiqdir.

şəkil - cəsarətli və gözəl Arina Vaxruşkina, Moskva

Rusiyada 2 milyon azərbaycanlı daimi yaşayır. Bir azərbaycanlı ilə uzun-uzadı söhbət etmişəm, moskvalı iş adamıdır. Deyir ki, onun üçün 1500 nəfər işləyir. Uğurun bütün zahiri göstəriciləri var. bakılıdır, savadlıdır. O, məndən Rusiya, Ukrayna haqqında fikrimi soruşdu. Moskvalı Putinin məlum müddəalarını təkrarladı ki, ukraynalılar rusdur, rusların babaları Krım uğrunda döyüşüblər, ona görə də - “Krım bizimdir”, ukraynalılar isə faşistdir. Ukraynanın şərqində sakinlər qanuni olaraq öz müqəddəratını təyin ediblər. Dediyi hər cümlənin beynəlxalq hüququn faktları və məqamları ilə təkzib olunduğunu bilmir.

Əsas odur ki, hörmətli qonağım Rusiyadakı azərbaycanlılar adından etiraz etdi ki, Azərbaycan dövləti və xalqı Ukraynaya qarşı hərəkətlərində Rusiyaya dəstək vermir. Rusların tezisi belədir: 10 milyon azərbaycanlı düşünmür ki, Ukrayna ilə həmrəylik nümayiş etdirməklə Putini azərbaycanlıları Rusiya Federasiyasından çıxarmağa məcbur edəcəklər. Fərqi yoxdur, - deyə qonaq bildirir, - Putin Ukraynadakı planlarını sona çatdıracaq. Sanksiya-manksiyalar təsir etmir, ruslar yoxsulluq içində yaşaya bilirlər, birinci dəfə deyil. Və Rusiyanın 2 milyon azərbaycanlısı bundan əziyyət çəkəcək.

uşaq arabaları olan meydanın fotosu, Lviv

Məsələ ciddidir. Rusiyadakı azərbaycanlıların öz həqiqətləri var. Hazırda Ukrayna ordusunda döyüşən, bu ölkənin vətəndaşı, vətənpərvərləri olan Ukrayna azərbaycanlılarının isə öz həqiqətləri var.

Bəs ölkəni heç vaxt tərk etməyən, öz dövlətimizdə həyat quran, Rusiyanın, Ukraynanın deyil, Azərbaycanın problemləri, qələbələri ilə yaşayan bizlər necə? Biz burada şərəfi, xeyirxahlığı, ədaləti unutmalıyıqmı? Vicdanı bir kənaramı qoyaq? Dünən Lvovda sakinlər öldürülən ukraynalı uşaqların sayına görə meydanda 109 boş uşaq arabası yerləşdiriblər. Bunu görməmək olarmı? İki milyon Rusiya azərbaycanlısının iddialarına necə cavab vermək olar?

Kamal Əli