Sərhədçilər dənizdə iranlı qaçaqmalçıları saxlayıblar

İrandan Azərbaycana narkotik maddə gətirən qrup ifşa olunub. Bu brədə Dövlət Sərhəd Xidməti və Baş Prokurorluğun birgə məlumatında deyilir.

Məlumat görə, iyunun 24-də gecə saat 23:00-a yaxın Xəzər dənizində Sumqayıt şəhəri və Yaşma qəsəbəsi istiqamətində qayıqla hərəkət edən İran vətəndaşları Nuri Əbruntən (1983-cü ildə anadan olub), Bəhmən Kaseb (1984-cü il) və Aunəq Abdulrəhim sərhədçilərin “dayan” əmrinə tabe olmayıblar, yükü dənizə atıblar və gizlənməyə cəhd ediblər. Təqib nəticəsində onları saxlamaq mümkün olub.

Bundan əlavə, Yaşma qəsəbəsi ərazisində keçirilən əməliyyat tədbirləri nəticəsində iki nəfər Azərbaycan vətəndaşı - Elxan Əliyev (1982-ci ildə anadan olub) və Esmira Məmmədova (1976-cı il) saxlanılıb. Onların  dəniz sahilində və suyun içində fənərlərlə işarə verərək olduqları yeri bəyan etmələri sərhədçilərdə şübhə oyandırıb  və onlar saxlanılıblar.

Binəqədi rayonunun Novxanı qəsəbəsi yaxınlığında davam edən əməliyyat zamanı ümumi çəkisi 4 kiloqrama yaxın olan 165 paket çətənə aşkar edilərək götürülüb.  Yük İran vətəndaşları tərəfindən qaçaqmalçılıq yolu ilə Azərbaycana gətirilib.

Faktlar üzrə Cinayət Məcəlləsinin 206.3.2 (qabaqcadan əlbir olan bir qrup şəxs tərəfindən qaçaqmalçılığa köməklik), 234.4-1 (narkotik vasitələrin və psixotrop maddələrin qanunsuz dövriyyəsi) və 318.2-ci ((Azərbaycanın dövlət sərhədini qanunsuz keçmə) maddələri üzrə cinayət işləri açılıb.

Saxlanılan şəxslər məhkəmənin qərarı ilə həbs edilib.

Təqibetmə əməliyyatı zamanı yaralanan Aunəq Abdulrəhim xəstəxanaya yerləşdirilib və sərhədçilərin xüsusi nəzarəti altındadır.