Sərnişinlər avtobuslarda nağdsız ödənişlər üçün mobil tətbiqdən istifadə edə bilər

Bakı/20.06.23/Turan: Azərbaycan Yerüstü Nəqliyyat Agentliyi avtobuslarda gediş haqqını ödəmək və səfər planlaşması aparmaqdan ötrü "BakiKart" plastik kartlarını idarə etmək üçün mobil tətbiqi istifadəyə verib.

Bu tətbiqlə istifadəçilər asanlıqla səfərlərini planlaya,“BakıKart” plastik kartların balansını artıra və gediş haqqını ödəyə bilər. Mobil tətbiqdə qeydiyyatdan keçmək üçün yalnız mobil nömrə və şifr kifayətdir.

İstifadəçilər marşrutları asanlıqla axtara, təyinat yerinə getmək üçün ən yaxın dayanacaqları tapa və avtobusları real vaxt rejimdə izləyə bilərlər.

Tətbiq istifadəçilərə bir neçə QR biletləri yaratmağa və QR bilet tarixçələrini görməyə imkan verir. İstifadəçilərə vaxta qənaət etmək imkanı qazandırır və ictimai nəqliyyatdan istifadə prosesini sadələşdirir.

www.bakikart.az saytı vasitəsilə qeydiyyatdan keçmiş istifadəçilər üçün mobil tətbiqdə yenidən qeydiyyatdan keçməyə ehtiyac yoxdur. İstifadəçilər yalnız qeydiyyatdan keçdikləri mobil nömrə və şifri daxil etməklə mobil tətbiqdən yararlana bilərlər.

“BakıKart” mobil tətbiqinin beta versiyasını həm “AppStore”, həm də “GooglePlayStore”da yükləmək mümkündür.

Tətbiq hazırda beta versiyada olduğu üçün istifadəçilər xətalarla və ya qeyri-dəqiq məlumatlarla qarşılaşa bilərlər.

Bununla əlaqədar olaraq beta versiya istifadəçilərindən qarşılaşdıqları xətalar barədə tətbiq vasitəsilə məlumat vermələri xahiş olunur.

Texniki məsələlərlə bağlı *4343 nömrəsinə və “141”Çağrı Mərkəzinə müraciət etmək mümkündür.-06В