Sinoptiklər hava şəraitinin pisləşəcəyi barədə xəbərdarlıq edirlər

Sinoptiklər hava şəraitinin pisləşəcəyi barədə xəbərdarlıq edirlər

Bakı/22.10.21/Turan: Gələn həftənin əvvəlində Azərbaycanda hava şəraitinin kəskin dəyişəcəyi gözlənilir. Belə ki, oktyabrın 25-də axşamdan başlayaraq oktyabrın 27-dək Bakıda və Abşeron yarımadasında yağış yağacağı, küləyin güclənəcəyi gözlənilir.

Oktyabrın 26-dan 27-nə keçən gecə və çərşənbə günü səhər yağıntı intensiv olacaq. 15-20 metr/saniyə sürətlə şimal-qərb küləyi əsəcək, arabir güclənərək 23-28 metr/saniyəyə çatacaq, bəzi yerlərdə isə 30-32 metr/saniyə olacaq.

Havanın temperaturu ötən günlərlə müqayisədə tədricən 4-6 dərəcə enəcək, Ekologiya və Təbii Sərvətlər Nazirliyi Milli Hidrometeorologiya Departamenti bildirir.

Həmin müddətdə Azərbaycanın rayonlarında da hava şəraitinin qeyri-sabit keçəcəyi gözlənilir.

Sinoptiklər şimşək çaxacağını, leysan yağacağını, dolu düşəcəyini proqnozlaşdırırlar. Dağ və dağətəyi rayonlarda qar yağacaq. Qərb küləyinin sürəti saniyədə 15-20 metrə çatacaq, bəzi yerlərdə 25-30 metr/saniyə olacaq.

Çaylarda suyun səviyyəsinin qalxması ehtimalı var, bəzi dağ çaylarında qısamüddətli daşqın və sel gözlənilir.

Havanın temperaturu ötən günlərlə müqayisədə tədricən 4-7 dərəcə enəcək.

Qeyd edək ki, qarşıdakı istirahət günlərində Bakıda və Abşeronda yağıntı olmayacaq, havanın temperaturu gündüz 19 dərəcəyə qədər yüksələcək.—0--