Son bir həftədə ən az 6 fəal həbs edilib

Bakı/25.09.23/Turan: Son bir həftədə 6 nəfər tənqidçi ictimai fəal və dindar fəalın həbs edilməsi ilə bağlı məlumatımız var. Onların sayı çoxdur, bir çoxunun ailələri həbsin ictimailləşdirilməsinin əleyhinə olduğundan ictimai qaydada məlumat yaymırıq. Bu barədə Turan-a hüquq müdafiəçisi Zəfər Əhmədov bildirib.

Onun sözlərinə görə, son bir həftədə ictimai fəallar Ruslan Vahabov, Mövsüm Məmmədov, Cavid Əliyev, jurnalist Nurlan Libre, dindar fəallar Elvin Sadıqov, İsfəndiyar Məmmədov (Müsəlman Birliyi Hərəkatı) həbs edilib. Elvin Sadıqov, İsfəndiyar Məmmədov Ruslan Vahabov barəsində narkotik ittihamı irəli sürülüb, Mövsüm Məmmədov, Cavid Əliyev, Nurlan Libre isə inzibati qaydada müxtəlif müddətlərə həbsə məhkum edilib.

Rəsmi qurumlar bu həbslərlə bağlı hələ məlumat yaymayıb.

Azərbaycan Talışların İçtimai Şurasının (ATİŞ) təşkilatının  üzvü Vahabov Ruslan Adil oğlunun həbsilə bağlı bəyanat yayıb. Sənəddə qeyd edilir ki, Vahabov  22 sentyabr 2023-cü il tarixdə səhər evdən çıxıb işə getmişdir. Bundan sonra ailə üzvləri onunla heç bir əlaqə qura bilməmişlər. Yalnız səhərisi gün, ailə üzvlərinin axtarışı nəticəsində məlum olmuşdur ki, o, Nizami rayon polis idarəsində saxlanılır. Həftə sonu olduğuna görə Ruslan Vahabovla heç bir əlaqə saxlamaq mümkün olmamışdır. 25 sentyabr (həftənin birinci günü) səhər saatlarında məlum olmuşdur ki, Ruslan Vahabov bazar günü ailə üzvlərinin heç bir xəbəri olmadan məhkəmə qarşısına çıxarılmış, ona narkotika ittihamı irəli sürmüş və barəsində dörd ay müddətində həbs qəti-imkan tədbiri seçilmişdir. 

Ruslan Vahabov ictimai fəaldır. O, sosial şəbəkələr üzərində Azərbaycan hakimiyyətinin ayrı-ayrı idarəetmə institutlarının fəaliyyətini gündəlik tənqid edirdi. Eyni zamanda o, mənsub olduğu talış etnosunun konstitutsion milli-mədəni özünüifadə haqlarının təminatını tələb edirdi.  İctimai fəallığa görə o, əvvəllər bir neçə dəfə polis tərəfindən şifahi xəbərdarlıqlara məruz qalıb. 

Ruslan Vahabovun narkotika aludəçisi olması və onun narkotik maddə alış-verişi ilə məşğul olması ittihamı açıq formada atılan bir şərdir. 
 
ATİŞ hesab edir ki, Ruslan Vahabovun həbs olunması onun baş verən qanunsuzluqlara qarşı sərgilədiyi obyektiv, ədalətli və cəsarətli vətəndaş mövqeyi ilə bağlıdır.  Ona qarşı rəsmiləşdirilən növbətçi “narkotika” ittihamının onun ictimai fəaliyyətinə görə olduğu şübhə doğurmur. 

Ölkəmizin indiki həssas siyasi burulğanlar dövründə hüquq mühafizə orqanlarının vətəndaş cəmiyyətinin fəal nümayındələrinə qarşı apardığı bu həbs ovunu qətiyyətlə pisləyirik. Düşünürük ki, bu formada saxtalaşdırılan həbs əməliyyatları ölkəmizdə ədalətli, demokratik, sivil, bərabərhüquqlu vətəndaş cəmiyyətinin qurulması əlehinə yönəlmiş pravokasiya əməlidir!

ATİŞ narkotik ittihamı ilə şərlənərək həbs olunmuş gənc ictimai fəal, Azərbaycan Talışların İctimai Şurasının üzvü Vahabov Ruslan Adil oğlunun dərhal azad olunmasını tələb edir.
"Müdafiə Xətti" hüquq müdafiə təşkilatının icraçı direktoru Rüfət Səfərov Turan-a deyib ki, reinteqrasiya siyasətindən bəhs olunduğu zamanda ölkənin daxilində insan hüquq və azadlıqlarəna hörmət ruhunda iş aparmaq lazımdır.  

"Alternativ fikrə, müstəqil düşüncəyə, tənqidçi əhval-ruhiyyəyə dözümlü yanaşmaq lazımdır. Amma, biz görürük ki, hər gün Azərbaycanda siyasi yüklü təqib baş verir. Son aylar ərzində elə bir gün yoxdur ki, təqib olmasın. Son dövrlər isə müharibə əleyhdarı olan şəxslər həbs edilir, onların aralarında jurnalist, bloger, ictimai fəal, siyasi tənqidçilər də var. Hesab edirəm ki, aparılan xüsusi repressiv tədbirlər, belə həssas və məsuliyyətli məqamda Azərbaycan diplomatiyasının və hərbiyəsinin əlini zəif edir", deyə o qeyd edib.

Seçkilərin Monitorinqi və Demokratiyanın Tədrisi mərkəzinin rəhbəri Anar Məmmədli Facebook səhifəsində yazıb ki, son iki gün ərzində 4 nəfər ictimai fəalın anti-terror əməliyyatına tənqidi yanaşdığı üçün saxlanması, siyasi motivlərlə azadlıqdan məhrum edilməsi sülh və reinterqasiya bəyanatlarının səmərəsini azaldır.

"Siz bu cür həbslərlə heç kimi inandıra bilməzsiniz ki, Qarabağ münaqişəsi konstruktiv şəkildə həll olunacaq. Çünki istənilən sülh sazişi o zaman legitimlik qazanır ki, onu tənqid edənləri siyasi təqib gözləmir. Legitimlik qazanmayan sazişlər isə müvəqqəti olur", deyə o qeyd edib.

03