Sosial şəbəkələrə giriş məhdudiyyəti: zərər veririk, ya kömək edirik?

Bakı/08.10.20/Turan: Sentyabrın 27-də hökumət orqanların qərarı ilə əhalinin bütün sosial şəbəkələrə sərbəst girişi məhdudlaşdırılıb. Müharibənin ilk günü rəsmi olaraq bunun düşmən təbliğatına qarşı mübarizə zərurətindən irəli gəldiyi bəyan edilmişdi.

Anlayışla qarşılanan bu tədbir eyni zamanda məlumat, o cümlədən rəsmi məlumat əldə edilməsi və yayılması ilə bağlı ciddi narahatlıqlara səbəb olub.

Azərbaycan Müdafiə Nazirliyi öz saytında hərbi əməliyyatlar haqqında videosüjetləri YouTube formatında yerləşdirir, amma əhali onları yalnız TV-dən izləyə bilir, belə ki, YouTube-a giriş bloklanır.

Bir çox istifadəçilər və KİV qadağalardan yayınmaq üçün anonimayzerlər yükləmək məcburiyyətindədir, amma internetin sürətinin aşağı olması bu proqramlardan istifadə etməyə imkan vermir, çünki internetin sürəti 80% aşağı düşüb.

Əhaliyə internet xidmətləri göstərən “Baktelekom” MMC-dən Turan-a Azərbaycanda internet-trafikin sürətinin qəsdən aşağı salındığını təsdiq ediblər.

İnternet əlaqəsinin keyfiyyətinin pisləşməsi koronavirusla əlaqədar distant təhsil verən orta və ali məktəblərdə tədris prosesinə də mənfi təsir edib.

Müəllimlərin sözlərinə görə, əlaqə pis olduğuna görə on-layn rejimdə dərslər baş tutmur.

Müdafiə Nazirliyinin bu problemdən xəbəri var və döyüş əməliyyatları başa çatan kimi, tezliklə problemin həll ediləcəyini hesab edirlər, bu idarədən Turan-a belə deyiblər.

Bu vəziyyət informasiya müharibəsinin ön cəbhəsində olan KİV işçiləri üçün xüsusilə problem yaradır.

Ekspertlərin fikrincə, İnternetə girişin məhdudlaşdırılması erməni istifadəçilərin sosial şəbəkələrdə fəallaşmasına və düşmənin mövqeyini təşviq etməsinə imkan yaradıb. -0-