Sumqayıtda səs-küy doğuran qətldə ittiham olunan şəxs həbs olunub

Bakı/31.10.23/Turan: Ötən şənbə Sumqayıt şəhərinin Corat qəsəbəsində iki nəfəri öldürməkdə, daha 4 nəfəri yaralamaqda ittiham olunan Müşfiq Tağıyev həbs olunub. Bu barədə DİN və Baş Prokurorluğun mətbuat xidmətlərinin 31 oktyabr tarixli birgə məlumatında deyilir.

İstintaqla əvvəllər məhkum edilmiş 1987-ci il təvəllüdlü Müşfiq Tağıyevin qonşusu Anar Fərəcovdan qisas almaq məqsədilə sonuncunun ailəsinin yaşadığı həyətə gələrək evin divarlarına benzin töküb yandırması və özünün hazırladığı partlayıcı qurğunu partlatdıqdan sonra odlu silahdan atəş açaraq evdən çıxan Dağbəyi Fərəcov və Susana Karakaşı qəsdən öldürməsi, Tərlan Fərəcova və Serkan Karakaşı, eləcə də onlara köməyə gələn qonşuları Etibar Sarıyev və Mehman Sarıyevi qəsdən öldürməyə cəhd etməsinə əsaslı şübhələr müəyyən edilib.

Tağıyevə qarşı Cinayət Məcəlləsinin 120.2.4, 120.2.7 (xüsusi amansızlıqla və ümumi təhlükəli üsulla iki şəxsi öldürmə) 29, 120.2.3, 29, 120.2.4, 29, 120.2.7 (xüsusi amansızlıqla və ümumi təhlükəli üsulla ictimai borcunu yerinə yetirən iki şəxsi öldürməyə cəhd), 29, 186.2.1, 29, 186.2.2 (külli miqdarda ziyan vurmaqla yandırmaqla və partlatmaqla  əmlakı qəsdən məhv etməyə cəhd) və 229.1-ci (qanunsuz olaraq partlayıcı qurğuları hazırlama) maddələri ilə ittiham irəli sürülüb. İbtidai istintaq davam edir. 

Azərbaycan Baş Prokurorluğu və DİN KİV-ləri və sosial şəbəkə istifadəçilərini qanunvericiliyin tələblərinə riayət etməyə və dəqiqləşdirilməmiş məlumatları paylaşmamağa çağırıb. 

Qeyd edək ki, yerli KİV-lərdə qeyd edilən cinayətin səbəbi ilə bağlı müxtəlif versiyalar, o cümlədən borc pulun qaytarılmaması versiyası irəli sürülürdü. 06В