Taleh Bağırova qarşı yeni cinayət işinin istintaqı tamamlanıb

Bakı/28.12.17/Tutran: Dekabrın 27-də Qobustan qapalı həbsxanasında saxlanılan "Müsəlman Birliyi" Hərəkatının lideri Taleh Bağırova yeni ittiham elan edilib. Bu barədə Turan-a vəkil Cavad Cavadov bildirib.

O, dünən Taleh Bağırovla görüşüb.

"Ədliyyə Nazirliyinin İstintaq İdarəsinin müstəntiqi tərəfindən mənim iştirakımla ona Cinayət Məcəlləsinin 317-2.1 maddəsi ilə ittiham elan edildi. İttihama görə, 2017-ci il iyulun 31-də onun üzərindən yeddi ədəd "microSD" tipli yaddaş kartları aşkar edilib. Keçirilmiş ekspertizalar həmin kartlarda Qurani Kərim, Quranın təsviri və başqa məlumatların olmasını göstərib, vəkil qeyd edib.

C.Cavadovun fikrincə, həmin kartlarda qadağan olunmuş hər hansı məlumatlar olmayıb.

"Taleh Bağırov özünü təqsirli bilmir, ittihamı qəbul etmir və ifadə verməkdən imtina edir. İfadəni məhkəmədə verəcəyini bildirir. Bu səbəbdən həmin ittihama onun münasibəti ilə bağlı bundan artıq məlumat verə bilmirəm".

Vəkil deyib ki, cinayət işinin istintaqı tamamlanıb və iş materialları ilə tanışlıq mərhələsidir.

Vəkil dekabrın 27-də həmçinin Qobustan həbsxanaısnda Abbas Hüseynov və Mövsüm Səmədovla görüşüb. "Səhhətləri yaxşıdır", o qeyd edib.

Taleh Bağırov 2015-ci il noyabrın 26-da Baş Mütəşəkkil Cinayətkarlıqla Mübarizə İdarəsinin Bakının Nardaran qəsəbəsində keçirdiyi xüsusi əməliyyat zamanı həbs olunub.

Bakı Ağır Cinayətlər Məhkəməsinin hökmü ilə T.Bağırov 20 il müddətinə azadlıqdan məhrum edilib.-03B-