Trol şəbəkəsinin arxasında kim dayanır; Hakimiyyət, yoxsa AXCP? – Seymur Həzi "Çətin sual" qarşısında -Canlı

Bakı/16.04.21/Turan: Aprelin 13-də Britaniyanın The Guardian qəzetində dərc olunmuş “Feysbuk bizim kimi ölkələrlə maraqlanmır: Azərbaycan trol şəbəkəsi qadağadan bir neçə ay sonra geri qayıdır” sərlövhəli məqalədə Feysbuk-un Azərbaycandakı trol şəbəkəsinə qadağalar tətbiq etməsindən altı ay sonra müstəqil xəbər agentlikləri və müxalif siyasətçiləri hədəf alan və dövlətin dəstəyi ilə aparılan trol kampaniyasının yenidən işə başladığı deyilir. Qəzetdə bildirilir ki, Feysbuk-un əməkdaşı Sofi Janqın 2019-cu ilin avqust ayında öz menecerləri və şirkət icraçılarına Azərbaycanda təqib kampaniyasının mövcud olduğu ilə bağlı məlumat verməsindən sonra sosial media şirkəti 14 ay boyunca Azərbaycanın hakim partiyası - Yeni Azərbaycan Partiyasının bir qolunun bu kampaniyanı həyata keçirməsinə imkan verib. Feysbuk 2020-ci ilin oktyabr ayında “koordinasiya edilmiş saxta davranış” əleyhinə qaydaları pozduqlarına görə Yeni Azərbaycan Partiyası ilə əlaqəsi olan 8,000 Feysbuk və İnstagram hesabı və səhifəsini sildiyini elan edib.

Yeni Azərbaycan Partiyasından isə bildiriblər ki, partiyanın 760 mindən çox üzvü var. Bu üzvlərin 300 minə qədəri gənclərdir. YAP-ın bu qədər üzvünün olması partiyanın trol qrupları saxladığını deməyə əsas vermir. YAP-ın və partiya sədri Prezident İlham Əliyevin bu qədər partiya üzvləri tərəfindən dəstəklənməsinə trol adının verilməsi də siyasi və hüquqi məsuliyyət kəsb edir.

“Bildiririk ki, Azərbaycanda sosial şəbəkələrdə, xüsusilə də facebook üzərindən trol şəbəkəsini Azərbaycan Xalq Cəbhəsi Partiyası yaradıb. Bu gün ən böyük trol şəbəkəsinə məhz onlar sahibdirlər. Hesab edirik ki, “The Guardian” qəzetinin YAP haqqında yazdığı böhtan, şər AXCP-nin və Əli Kərimlinin trol şəbəkəsini ifşa etdiyi üçün YAP-a qarşı aparılan qara piar kampaniyasının tərkib hissəsidir”

AXCP sədrinin müavini Seymur Həzi bu gün saat 15:00-da Kamran Mahmudovun təqdimatında yayımlanan“Çətin sual” verilişində YAP-ın iddialarına cavab verəcək.