Türkanda "ölü ruhlar" özbaşınalığa qarşı üsyan edir

Bakı/20.04.21/Turan: Bakının Türkan qəsəbəsinin iki nəfər yaşlı qadın sakini - 91 yaşlı Xumar Şabanova və 81 yaşlı Əzizəxanım Atayeva yerli məmurların və işbazların fırıldağının qurbanı olub. Sənədlərin saxtalaşdırılması nəticəsində torpaq mülkiyyəti hüquqlarının mənimsənilməsi məqsədilə qadınları "ölü" elan ediblər. 

"Təqsirkarlar" məsuliyyətə cəlb edilib, amma… 

Şabanova və Atayeva hüquqlarının bərpası, habelə onlara kömək etməyə qərar verən qonşuları Natiq Məhəmmədsoyun azad edilməsi tələbi ilə aprelin 12-dən aclıq edirlər. Aclıq aksiyasında həbs edilmiş şəxsin anası Tamara Süleymanova da iştirak edir. 

Qeyd edək ki, Baş Prokurorluğun İstintaq İdarəsi Atayeva və Şabanovanın ölmüş kimi rəsmiləşdirilməsi və onların torpaq sahələrinin mənimsənilməsi haqqında iş üzrə araşdırma aparır. Əvvəlcə Xəzər rayon İcra Hakimiyyətinin Türkan qəsəbəsindəki keçmiş nümayəndəsi Rahil Babayev  və qəsəbə sakini Çingiz Səfərov həbs edilib. 

Eyni zamanda xalq artistinin qohumu Daşqın Nəsirov barəsində axtarış elan edilib, o, 2020-ci ilin dekabrında saxlanılıb. Babayevə qarşı vəzifə saxtakarlığı və vəzifə səlahiyyətlərindən sui-istifadə, digər iki şəxsə qarşı isə  dələduzluq və sənədləri saxtalaşdırma ittihamı irəli sürülüb. 

Daşqın Nəsirovun səhhətindəki problemlərlə əlaqədər barəsindəki qətimkan tədbiri ev dustaqlığı ilə əvəz olunub, bu da zərərçəkmişlərin etirazına səbəb olub. 

Qadınlar istintaqın gedişatından narazıdırlar, belə ki, aylardır nəticə yoxdur, təqsirləndirilən şəxslərin “nümayəndələri” tərəfindən onlara təzyiq isə davam edir. Bundan başqa, onlara kömək edən Məhəmmədsoy həbs edilib. 

Aprelin 12-də qadınların Azərbaycan Baş Prokurorluğununda görüşü olub və onlar ilk növbədə Məhəmmədsoyun azad edilməsini tələb ediblər. Amma bu, heç bir nəticə verməyib və qadınlar aclığa başlamaq qərarına gəliblər. 

Münaqişənin predmeti Türkan qəsəbəsində bu qadınların ailələrinə hələ sovet dövründə verilmiş bağ sahələridir. Sovet ittifaqında bağ sahələri istifadə üçün müqavilə ilə verilirdi. Atayev və Şabanov ailələrinin hər birinin 25 sot sahəsi var idi. 

Ailə başçıları vəfat etdiyinə görə hüquqları həyat yoldaşlarına və övladlarına keçib. Torpaq sahələrinin ələ keçirilməsini asanlaşdırmaq üçün cinayətkarlar 2019-cu ildə saxtakarlığa əl atıblar. İcra Hakimiyyətinin nümayəndəsi Rahil Babayev Şabanovlar ailəsinin tərkibi haqqında saxta sənəd təqdim edib. Sənədə əsasən, torpaq sahəsindən istifadə hüququ yalnız Şabanovanın nəvəsinə - vəfat etmiş oğlunun qızına keçib (baxmayaraq ki, qadının dörd sağ böyük övladı var). 

Maxinasiyanın digər iştirakçısı, qəsəbədə makler kimi məşhur olan Çingiz Səfərov Şabanovanın ölümü haqqında saxta sənəd hazırlayıb. Onun nəvəsinin adından bağ sahəsi Çingiz Səfərovun adına keçirilib, o bu sahəni özəlləşdirib və Daşqın Nəsirova, o isə üçüncü şəxsə (kütləvi informasiya vasitələrinin məlumatına görə, ciddi şirkətin rəhbəri olan məşhur biznesmenə) satıb. 

Bütün bunlar 2020-ci ilin avqustunda, Xumar Şabanova bağı özəlləşdirmək üçün ASAN xidmət mərkəzinə müraciət etdikdə ortaya çıxıb. Orada ona bildiriblər ki,... o ölüb. 

Maraqlıdır ki, 2006-cı ildən ölmüş kimi qeydiyyatda olan qadın bütün bu illər ərzində pensiya alırdı. Bu, məlum olduqdan sonra Şabanovanın qonşuları narahat olublar və onlar da torpaq sahələrini özəlləşdirmək üçün müraciət ediblər. Məlum olub ki, Əzizəxanım Atayeva da 2014-cü ildən ölmüş kimi qeydiyyatdadır. Qəsəbə administrasiyasının arayışında yalnız bir oğlunun adı çəkilir, 2017-ci ildə ondan aldadaraq ümumi etibarnamə alıblar. Məlum olub ki, onların qohumu Çingiz Səfərov onu işə düzəltməyi vəd edib və ondan etibarnamə alıb. Sonradan Səfərov bildirib ki, kömək edə bilməyib və “etibarnaməni” Atayevanın oğlunun gözü önündə cırıb. Amma əslində o, etibarnamənin surətini cırıb, əsli isə torpaq sahəsini ələ keçirmək və sonradan Daşqın Nəsirova və daha sonra üçüncü şəxsə satmaq üçün istifadə edib.

Bütün bunlar barədə Şabanov və Atayev ailələrinin hüquqşünası danışıb. Onun sözlərinə görə, dələduzların qanunsuz əməlləri bununla bitməyib. Atayevlərin və Şabanovların torpaq sahələri dənizdən bir kilometr məsafədə yerləşir. Amma fırıldaqçılar dənizdən 100 metr məsafədə başqa yerdə 1.25 ha-lıq mülkiyyət hüquqlarını da rəsmiləşdirməyə müvəffəq olublar. Bu torpaq dövlət mülkiyyəti idi. Amma özəlləşdirmə zamanı bağ sahələrinin koordinatları saxtalaşdırılıb.

Bütün bunları Bakı şəhəri üzrə Daşınmaz Əmlakın Dövlət Reyestri Xidmətinin əməkdaşlarının iştirakı olmadan etmək qeyri-mümkündür.

“Bəzi məlumatlara görə, idarənin bu işə cəlb edilmiş iki yüksək vəzifəli məmuru bu günlərdə həbs edilib”, deyə hüquqşünas bildirib.

Dövlət Reyestri Xidmətinin işçilərindən başqa, torpaq sahəsi üzərində hüququn Şabanovlardan və Atayevlərdən keçməsini rəsmiləşdirən notarius da maxinasiyalarda iştirak edib. “Notarius  sistemə iki qadının ölümü haqqında şəhadətnaməni daxil etməli və yoxlamalı idi. Bu halda saxtakarlıq üzə çıxardı”, deyə hüquqşünas bildirib.

Alqı-satqı obyekti dövlət torpaqları idisə, cinayətkarların Şabanovların və Atayevlərin sənədlərini niyə saxtalaşdırdığı barədə suala cavabda hüquqşünas bildirib ki, onlara yalnız özəlləşdirmə üçün formal bəhanə lazım idi. 

Həqiqətpərəstlə “hesablaşma”

Qadınların hüquqlarının müdafiəsində kömək etmək qərarına gələn yerli sakin Natiq Məhəmmədsoy həbs edilib. Onun aclıq aksiyasında iştirak edən anası Tamara Süleymanova Turan-a bildirib ki, oğlu martın 5-də Qala qəsəbəsində saxlanılıb.

Amma polis iddia edir ki, Məhəmmədsoy öz evinin yaxınlığında saxlanılıb, daha sonra onun maşınında və evində axtarış aparılıb. Amma Qala qəsəbəsində yerləşən avtomobil təmiri emalatxanasının işçiləri müdafiə tərəfinə Məhəmmədsoyun onların yanında saxlanıldığı və “Niva”ya mindirildiyi barədə ifadə veriblər. Məhəmmədsoyun avtomobilin sükanı arxasına isə polis oturub. Onu evə gətiriblər, ardınca isə avtomobilini də gətiriblər. 

“Yolda Natiqin maşınına nə istəsən ata bilərdilər. Guya bizim evimizdə narkotik, maşında isə tapança tapıblar. Vəkil silahdakı barmaq izlərinin ekspertizası haqqında vəsatət qaldırıb, amma ekspertiza keçirilmir. Çünki bilirlər ki, orada Natiqin barmaq izi yoxdur, bütün bunları – silahı, narkotiki onlar özləri atıblar”, deyə qadın bildirib.

O, həmçinin qeyd edib ki, oğlunun Qaladan “Niva” ilə Türkana aparılması və avtomobilinin gətirilməsi müşahidə kameralarında əksini tapıb və bu kadrlardan biri kütləvi informasiya vasitələrində dərc edilib.

Müdafiə tərəfi kamera qeydlərini tələb edib və avtomobil təmiri emalatxanasındakı şahidlərin ifadələrinin işə qoşulması barədə vəsatət qaldırıb. Müdafiə tərəfi həmçinin tapançadakı, onun döyüş komplektindəki və içərisində marixuana olan üç kibrit qutusunun və içərisində çətənə olan beş kibrit qutusunun üzərindəki barmaq izlərinin ekspertizası haqqında vəsatət qaldırıb. Amma vəsadətlər təmin olunmayıb.

Anası hesab edir ki, oğlunu sifarişlə həbs ediblər, dəlillər isə o qədər əsassız idi ki, Xəzər rayon məhkəməsi onu həbs etməyib, ev dustaqlığına məhkum edib. Amma Xəzər rayon prokuroru Fəxri Ələsgərov şəxsən Məhəmmədsoyun həbsi barədə vəsatət verib. O, 7 ilədək azadlıqdan məhrum edilə bilər.

Yaşlı qadınlar onun azad edilməsini və bağ sahələri üzərində hüquqlarının bərpa edilməsini tələb edirlər. –06D-