Vəkil məhkəmədə "sevgili" sözünün işlədilməsinin əleyhinədir. Hakim razılaşıb

Bakı/01.02.23/Turan:Uzun fasilədən sonra Bakı Ağır Cinayətlər Məhkəməsində “Murov” tikinti şirkətinin kadrlar şöbəsinin müdiri Nelli Fabriçnayaya qarşı proses davam edib. Bu şirkətin sahibi Əfqan Zeynalov Fabriçnayanı 720 min manat ekvivalentində dollar oğurlamaqda ittiham edir. Nelli ittihamı rədd edir.

Uzun sürən məhkəmə prosesində seyfin sındırılması və oradakı pulun oğurlanması ilə bağlı heç bir sübut tapılmayıb, eləcə də Zeynalovun belə bir məbləği seyfdə saxlamasına dair sübut yoxdur. Təəccüblüdür ki, “Murov” şirkətinin öz ofisi olsa da, Zeynalov şirkətin seyfini Nelli Fabriçnayanın atasının mənzilində quraşdırıb. Zeynalovun qardaşları Bakıda yaşayırlar. Zeynalov öz tabeliyində olan şəxsin atasının mənzilinə seyf quraşdırmasının səbəbilə bağlı suala ağlabatan cavab verməyib. Bu məbləğin mənşəyi barədə hakimin sualına isə emosional şəkildə cavab verib ki, pulu zibillikdən tapıb. Və məhkəmə hələ də pulun mənşəyini və bu faktı üzə çıxarmayıb: İstintaq materiallarında keçən məbləğ həqiqətən seyfdə olubmu? Zeynalovla Fabriçnaya arasındakı münaqişənin maraqlı epizodları Zeynalovun öz tabeliyində olan işçiyə qarşı geniş həssas diapazonda – dostluqdan tutmuş qadını döyməyə qədər - şəxsi münasibətidir. Fabriçnayaya qarşı zorakılıq epizodu barədə qadın özü məlumat verib. Zeynalov isə israr edir ki, Nelli onu zəhərləməyə cəhd edib.

"Bu işin maraqlı epizodları prosesi Amerikanın “Santa Barbara” serialına bənzədir", - bir oxucu məhkəmə zalından prosesləri işıqlandıran müəllifə deyib.

Prosesə hakim Faiq Qəniyev sədrlik edir. Zeynalovun vəkili İlhamə Həsənovadır. Fabriçnayanı vəkil Qəzənfər Rzayev müdafiə edir.

Yanvarın 30-da məhkəmədə proses iştirakçılarının dediyi kimi, Nelli ilə bir neçə il yaxın şəxsi münasibətdə olan şahid Rauf Zülfüqarov çıxış edib. Bu səbəbdən də Zülfüqarovun digərlərindən çox bildiyi və məhkəməyə kömək edə biləcəyi ehtimal edilirdi. Amma bu baş vermədi, şahid bir çox sualı yarımçıq cavablandırıb, “xatırlamadığını”, istintaq zamanı bəzi ifadələri təzyiq altında verdiyini söyləyib. Hakim Qəniyev növbəti iclasda Zülfüqarovun istintaq mərhələsində verdiyi ifadəni oxumaq niyyətindədir. Şahid məhkəməyə öz vəkili ilə gəlib, belə ki, istintaq materiallarının qanunsuz saxlanması ilə bağlı ona qarşı ittiham irəli sürüləcəyindən ehtiyat edib. Müdafiə tərəfi belə ittihamı əsassız hesab edir. Vəkil Rzayevin sözlərinə görə, Zülfüqarov, sadəcə, müdafiəçi və müstəntiqin onun diqqətinə çatdırdıqlarından xəbərdardır.

Rauf Zülfüqarov deyib ki, 2007-ci ildə Nellidən 30 min dollar borc alıb, Nelliyə qarşı cinayət işinin başlandığını biləndə borcu tam qaytarıb. Onların arasında başqa pul münasibətləri də olub, o cümlədən istintaq zamanı Zülfüqarovun Nellidən 120 min dollar alması epizodu yada salınıb. Rauf bu məbləği təsdiqləmir. Rauf Fabriçnaya ilə söhbətlər üçün ayrıca mobil telefon nömrəsi alıb və ümumiyyətlə, vəkil Həsənovanın dediyinə görə, onun 60 telefon nömrəsi var.

Əfqan Zeynalovun müdafiəçisi bahalı hesab etdiyi 8 avtomobilin siyahısını oxuyub, halbuki, onların arasında büdcəli Koreya avtomobilləri də olub. O bildirib ki, Zülfüqarovun səkkiz avtomobili var, ancaq Rauf üç avtomobilinin olduğunu etiraf edir. O, məhkəmədə bildirib ki, Zeynalovun vəkilinin iddiası üzrə avtomobillərə onların Fabriçnayanın şirkət rəhbərindən “oğurladığı” pullarla alınması şübhəsilə həbs qoyulub. Hakim vəkilə irad tutub ki, etibarnamə üzrə istifadə edilən avtomobillər istifadəçinin mülkiyyəti sayıla bilməz.

Zülfüqarov Gürcüstanda olarkən Zeynalovun Fabriçnayanı döydüyünü öyrənib. Oradan Nelliyə məsləhət görüb ki, polisə şikayət etsin. Həmçinin o, Nellinin Zeynalovu zəhərləməsi ehtimalı barədə iddialardan da xəbərdar olub. Prosesin bu yerində hakim şahidə sevgilisinin döyülməsini öyrənərək dözdüyünə təəccübləndiyini bildirib.

Hakim Qəniyev Zülfüqarova suallarında onunla Fabriçnaya arasındakı münasibəti xarakterizə edən “sevgili” sözünü bir neçə dəfə işlədib, lakin vəkil Rzayev buna etiraz edib və hakim daha bu sözdən istifadə etməməyə razılaşıb.

Əfqan Zeynalov Zülfüqarovla tanış deyil, bir-birini görməyiblər, - bu, hakimlə Rauf arasında sual-cavabdan məlum olub. Həmçinin məlum olub ki, Zülfüqarov Nellinin atası ilə görüşüb. Zülfüqarovun qardaşı cinayətə görə mühakimə olunub. Hakimin sözlərinə görə, Zülfüqarov qardaşını azad etmək üçün Zeynalovdan oğurlanan pullardan istifadə edə bilərdi.

Yanvarın 30-da keçirilən proses hakimin ittiham tərəfinə- Zeynalova iki xəbərdarlığı ilə seçilib. O, Fabriçnaya barəsində kobud danışıb, müttəhimlər kürsüsündə şüşə barmaqlıq arxasında oturan qadının üstünə qışqırıb, ona barmağını silkələyib. Hakim bu davranışı yolverilməz hesab edib.

Zeynalov da narazıdır. O, hakimə prosesin obyektivliyinə şübhə etdiyini bildirib. Firma sahibi işin təkrar istintaqa qaytarılması barədə vəsatəti təkrarlayıb. Zeynalov hesab edir ki, istintaq cinayət işinin vacib aspektlərini əks etdirməyib.

Hakim Qəniyev Fabriçnayanın ev dustaqlığına keçirilməsi barədə vəkil Rzayevin vəsatətini təmin etməyib. Vəkil hesab edir ki, onun 3 aydan çoxdur ki, Bakı İstintaq Təcridxanasında saxlanması işgəncədir. Təcridxanada şənbə- bazar günləri vəkillə görüş qadağandır, iş günləri isə vəkil proseslərdə iştirak edir. Bundan əlavə, əvvəllər ayağında elektron bilərziklə ev dustağı olan Nelli istintaqdan yayınmayıb. Amma vəkil Həsənova müttəhimin istintaq təcridxanasından buraxılmasının əleyhinə olub və bunu onunla əsaslandırıb ki, məhkəmə çarpaz dindirmələr aparacaq və o zaman Nelli evdə olarkən şahidlərə təzyiq göstərə biləcək.

Bu proses barədə əvvəlki məqalələr:

Şübhəli məhkəmə

Bakı Ağır Cinayətlər Məhkəməsində Turan agentliyinin ünvanına ittihamlar səslənib

Şahidlər “Murov” şirkətində pul oğurluğunu təsdiqləmirlər

Bəzi məhkəmələr humanistləşdirilmə ilə bağlı prezidentin sərəncamını icra edirlər, bəziləri yox

Şübhəli məhkəmə: İttihamçının bacısı prosesə kidneppinqlə bağlı yeni detektiv qeydləri təqdim edib

İttihamçı Zeynalov məhkəmədən işin yeni istintaqa qaytarılmasını xahiş edir

Ağır Cinayətlər Məhkəməsində ittihamçı hakimin yanında şahidi hədələyib

Nelli Fabriçnayanın işi üzrə məhkəmədə okkultist ortaya çıxıb

İttiham tərəfinin yeni vəkili öz müvəkkilinə qarşı faktları üzə çıxarır

Şübhəli məhkəmə: Şübhələr getdikcə artır