Vəkil Polad Aslanova bəraət verilməsini xahiş edir

Bakı/06.11.20/Turan:  Ötən gün Bakı Ağır Cinayətlər Məhkəməsində xeberman.com saytın təsisçisi və redaktoru Polad Aslanovun işi üzrə prosesdə vəkil Elçin Sadıqov yekun sözü ilə çıxış edib.

O, məhkəmədən jurnalistə bəraət verilməsini xahiş edib.

“Polad Aslanovu dövlətə xəyanətdə ittiham etsələr də əslində, jurnalist fəaliyyəti ilə əlaqədar həbs edilib. Bu, ittihamın məzmunundan da görünür. Orada qeyd olunur ki, Polad Aslanov öz yazıları ilə hüquq-mühafizə orqanlarının fəaliyyətinə “kölgə salmağa çalışıb”. Bu, onun məhz media işinə görə təqib olunduğunu deməyə əsas verir”, - vəkil bildirib.

Onun sözlərinə görə, saxlandıqdan sonra ilk “etirafedici ifadəsini” həyat yoldaşının həbs təhlükəsi altında verib.

P.Aslanov noyabrın 16-da məhkəmə iclasında son sözlə çıxış edəcək.

P.Aslanov 2019-cu il iyunun 12-də saxlanılıb və CM-in 274-cü maddəsi (dövlətə xəyanət) ilə ittiham olunub.

İstintaqı Dövlət Təhlükəsizliyi Xidməti aparır. Oktyabrın 5-də jurnalistin həbs müddəti daha 4 ay uzadılıb. İstintaq iddia edir ki, P.Aslanov jurnalist həmkarlarını cəlb edərək onları İran xüsusi xidmət orqanları ilə əməkdaşlığa sövq edib.

P.Aslanov bütün ittihamları rədd edib, bildirib ki, onu Dövlət Təhlükəsizliyi Xidmətinin işçilərinin korrupsiya faktlarının ifşasına görə təqib edirlər.

Oktyabrın 22-də prokuror P.Aslanovu 17 il müddətinə azadlıqdan məhrum etməyi təklif edib.

Jurnalistləri Müdafiə Komitəsi və “Sərhədsiz Reportyorlar” beynəlxalq təşkilatlar Azərbaycan hakimiyyətini P.Aslanovu azad etməyə və ona qarşı cinayət təqibinə son qoymağa çağırıblar.-06B-