Zamin Salayev məhkəmə iclasında huşunu itirib

Bakı/16.05.23/Turan:  Çərşənbə günü Azərbaycan Xalq Cəbhəsi Partiyasının fəalı, 100-cü gündür 1 saylı Bakı İstintaq Təcridxanasında aclıq edən Zamin Salayevin işi üzrə məhkəmə prosesində o, huşunu itirib. Qaradağ Rayon Məhkəməsində iclas dayandırılıb və "təcili yardım" briqadası çağırılıb. Həkimlər Salayevi məhkəmə zalında müayinə etdikdən və ona iynə vurduqdan sonra iclas davam edib.

Prosesdə iki şahid- hadisə yerinin yaxınlığında olan  taksi sürücülərinin ifadələri dinlənilib. Ancaq onlar deyiblər ki, hadisə yerində Salayevi görməyiblər.

Digər şahidlər iki polis əməkdaşı  və iki narkomandır. Zərərçəkən özü prosesdə etiraf edib ki, narkomaniyadan müalicə olunub və əvvəllər mühakimə edilib.

O bildirib ki, Salayev onu bıçaqla vurub. Lakin ekspertiza rəy verib ki,  ona "dərəcəsini müəyyən etmək mümkün olmayan xəsarət yetirilib”.

Ekspertizanın məlumatına görə, istintaqa maddi sübut kimi təqdim edilən bıçaqda Salayevin sol əlinin şəhadət barmağının izləri aşkar edilib. Amma vəkil Fəxrəddin Mehdiyevin qeyd etdiyi kimi, bıçağı bir barmaqla tutmaq mümkün deyil. Növbəti iclas mayın 22-nə təyin edilib.

*Zamin Salayev fevralın 7-də saxlanılıb, ertəsi gün Qaradağ Rayon Məhkəməsi onu həbs edib. Ona qarşı Cinayət Məcəlləsinin 221.3 – cü maddəsilə (xuliqanlıq-silah və ya silah kimi istifadə olunan əşyaların tətbiqilə  zərərçəkmişə qarşı güc tətbiqi) cinayət işi açılb. İttiham sübut olunarsa, Salayevi 5 ilədək həbs təhlükəsi gözləyir. Salayev öz həbsini sifariş hesab edir və məhkəmənin qərarına etiraz olaraq 100 gündür aclıq edir. ABŞ-ın Bakıdakı səfirliyi hakimiyyəti Zamin Salayevi və digər siyasi məhbusları azad etməyə çağırıb. 06B