Fransanın Ermənistana göndərdiyi hərbi texnika, İran səfirinin təxribatyönlü bəyanatı... – Nəsimi Məmmədli Çətin sualda

Bakı/13.11.23/Turan: Azərbaycanın Xarici İşlər Nazirliyi Fransanın Ermənistana “Bastion” çoxməqsədli zirehli avtomobillərinin və onlara məxsus avadanlıqların göndərilməsini pisləyib.Bu barədə nazirliyin Mətbuat İdarəsinin rəisi Ayxan Hacızadə açıqlama yayıb.

Ayxan Hacızadə bildirib ki, Fransanın Ermənistana hərbi texnika göndərməsi hazırda təcavüzkar siyasətdən və ritorikadan əl çəkməyən Yerevanın hərbi potensialını gücləndirməyə və bölgədə destruktiv fəaliyyətinə xidmət edəcək.

Noyabrın 12-də Ermənistan Fransadan hərbi yardım almağa başlayıb. Yardımın ilk partiyası artıq Gürcüstan vasitəsilə respublika ərazisinə gətirilib. Bu barədə Rusiya mediası məlumat yaymışdı.

Azərbaycan Xarici İşlər Nazirliyinin mətbuat katibi Ayxan Hacızadə İranın Ermənistandakı səfiri Mehdi Sübhaninin səsləndirdiyi qərəzli fikirlərə də münasibət bildirib, noyabrın 10-da İran İslam Respublikasının Ermənistan Respublikasındakı səfiri Mehdi Sübhaninin Ermənistanın “CivilNet” platformasına verdiyi müsahibə zamanı səsləndirdiyi təxribat zarakterli əsassız fikirləri qətiyyətlə pislədiyini bəyan edib.

İran prezidenti Ibrahim Rəisi İlham Əliyevlə görüşdə bildirmişdi ki, digər dövlətlərin İranla Azərbaycan arasında münasibətləri korlamaq cəhdləri uğursuzluğa məhkumdur.

Ertəsi gün İranın Ermənistandakı səfiri Mehdi Sübhani CivilNet-ə müsahibəsində əslində İran prezidentinin sözlərini təkzib edib.

“Biz beynəlxalq qaydalar çərçivəsində Ermənistan və Azərbaycanın ərazi bütövlüyünü tanıyırıq. Amma bu o demək deyil ki, Dağlıq Qarabağ əhalisinin hüquqları itiriləcək. Dağlıq Qarabağ xalqının hüquqlarına hörmət edilməli və onların öz müqəddəratını təyin etmək hüququ olmalıdır. Bu, Azərbaycanın gözardı edə bilməyəcəyi faktdır”, - deyə Sübhani bildirib.

Qeyd edək ki, İranın Azərbaycandakı səfiri də bir neçə gün əvvəl özünün sosial şəbəkə hesabından Azərbaycanı da məsələyə qatmaqla İsraili hədələyirdi.

Siyasi şərhçi Nəsimi Məmmədli Kamran Mahmudovun təqdimatında yayımlanan “Çətin sual” verilişində bunlar barədə danışır.