Məhkəmə icmalı: 4–5 iyun 2026-cı il

Korrupsiya və dövlət orqanları ilə bağlı məhkəmə prosesləri

1. İyunun 4-də Bakı Ağır Cinayətlər Məhkəməsində hakim Leyla Əsgərova-Məmmədovanın sədrliyi ilə Respublika Perinatal Mərkəzində 7 körpənin ölümünə səbəb olan yanğınla bağlı məhkəmə prosesi başa çatıb.

İclasda hökm oxunub. Hökmə əsasən, Perinatal Mərkəzin rəhbəri olmuş Mehriban Abasquliyeva 7 il 3 ay müddətinə, Hamlet Mustafayev 5 il 8 ay müddətinə, Elnur Əhmədli isə 5 il 2 ay müddətinə azadlıqdan məhrum ediliblər. Onların hər üçü məhkəmə zalında həbs olunub.

Respublika Perinatal Mərkəzindəki yanğın 2024-cü ilin yanvarında baş verib. Hadisə ilə bağlı Baş Prokurorluğun İstintaq İdarəsində ibtidai istintaq aparılıb. Toplanmış sübutlar əsasında Mərkəzin direktoru M. Abasquliyeva, Anesteziologiya, reanimasiya və intensiv terapiya şöbəsinin müdiri Hamlet Mustafayev və Dəstək Xidmətləri şöbəsinin müdiri Elnur Əhmədli cinayət məsuliyyətinə cəlb ediliblər. Onlara qarşı Cinayət Məcəlləsinin 308.2-ci (ağır nəticələrə səbəb olan vəzifə səlahiyyətlərindən sui-istifadə) və 225.3-cü (yanğın təhlükəsizliyi qaydalarını pozma ehtiyatsızlıqdan iki və daha çox şəxsin ölümünə səbəb olduqda) maddələri ilə yekun ittiham irəli sürülüb.

2. İyunun 4-də Qaradağ Rayon Məhkəməsində hakim Şəfa Dadaşovanın sədrliyi ilə Qaradağ Rayon İcra Hakimiyyətində keçirilən əməliyyat nəticəsində saxlanılan rayonun sabiq icra başçısı müavini Nadir Muradovun və digər sabiq vəzifəli şəxslərin cinayət işi üzrə məhkəmə istintaqı başlayıb.

İclasda təqsirləndirilən şəxslərə ittiham aktı elan olunub.

Növbəti iclas iyunun 12-nə təyin edilib.

Təqsirləndirilən şəxslər 2025-ci ilin noyabr ayında həbs olunublar. Onlar Qaradağ rayonu ərazisində yerləşən torpaq sahələri ilə bağlı ilkin rəsmiləşdirmə işlərinin aparılması və sonradan həmin torpaq sahələri üzərində mülkiyyət hüquqlarının dövlət qeydiyyatına alınmasının təmin edilməsi üçün ayrı-ayrı şəxslərdən müxtəlif məbləğlərdə rüşvət almaqda ittiham olunurlar.

Nadir Muradov, Qafar Abdullayev, Rəşad Nadirli, İsa Şəmsəliyev və Zülfüqar Mansurova Cinayət Məcəlləsinin 311.3.1-ci, 311.3.2-ci və 311.3.3-cü (qabaqcadan əlbir olan bir qrup şəxs tərəfindən təkrarən və külli miqdarda rüşvət alma) maddələri ilə ittiham elan edilib.

3. İyunun 5-də Bakı Ağır Cinayətlər Məhkəməsində hakim Vüqar Quliyevin sədrliyi ilə Bakıda yerləşən “İdrak” liseyində müəllimin güllələnməsi ilə bağlı cinayət işi üzrə məhkəmə prosesi başlayıb.

Hazırlıq iclasında anket məlumatları dəqiqləşdirilib.

Prosesdə təqsirləndirilən şəxsin vəkilinin və zərərçəkənin iştirak etməməsi səbəbindən iclas iyunun 17-nə təxirə salınıb.

Hadisə fevralın 6-da paytaxtın Binəqədi rayonunda yerləşən özəl “İdrak” liseyində baş verib. Məktəbdə odlu silahdan atəş açılması nəticəsində müəllim şagird tərəfindən güllələnib. Hadisəni törətməkdə şübhəli bilinən şagird saxlanılıb. Ona Azərbaycan Respublikasının Cinayət Məcəlləsinin 29-cu və 120.2.2-ci (xuliqanlıq niyyəti ilə adam öldürməyə cəhd) maddələri ilə yekun ittiham elan olunub.

4. İyunun 5-də ötən il 5 milyon manatlıq siqaret qaçaqmalçılığı ilə bağlı həbs edilən tanınmış iş adamı Ruslan Eyyubov həbsdən azad olunub.

Kütləvi informasiya vasitələrinin məlumatına görə, o, ev dustaqlığına buraxılıb.

Məhkəmə qətimkan tədbirini dəyişərkən R. Eyyubovun səhhətində yaranmış problemləri nəzərə alıb.

5. İyunun 5-də Bakı Ağır Cinayətlər Məhkəməsində hakim Hüseyn Hüseynlinin sədrliyi ilə 5 milyon manatlıq siqaret qaçaqmalçılığı ilə bağlı təqsirləndirilən şəxslərdən Fariz Məhərrəmovun cinayət işi üzrə məhkəmə baxışı keçirilib.

İclasda təqsirləndirilən F. Məhərrəmov məhkəmədə ifadə vermək istəmədiyini bildirib. O, özünü qismən təqsirli bilsə də, ona qarşı irəli sürülmüş Cinayət Məcəlləsinin 206.4-cü maddəsi üzrə özünü təqsirli bilməyib.

Təqsirləndirilən şəxs qeyd edib ki, siqaretlərin ölkəyə necə gətirilməsi barədə məlumatı yoxdur.

Növbəti proses iyunun 19-da saat 16:00-a təyin olunub.

İttihamda Fariz Məhərrəmovun xaricdən qaçaq yollarla xüsusilə külli miqdarda siqaret məmulatlarının daşınmasında və onların ölkə ərazisində satışının həyata keçirilməsində iştirak etdiyi qeyd olunub.

Qeyd olunan əməllərə görə ona Cinayət Məcəlləsinin 206.4-cü (qaçaqmalçılıq — xüsusilə külli miqdarda törədildikdə) və 213-1.2.1-ci (mütəşəkkil dəstə tərəfindən külli miqdarda aksiz markası ilə markalanmalı olan malların belə marka olmadan qanunsuz dövriyyəsi) maddələri ilə yekun ittiham elan edilib.