DŞAK Feysukdakı statusun izi ilə Xırdalanda qanunsuz tikintinin qarşısını aldı

Bakı/19.01.21/Turan: Xırdalan şəhərinin əsas küçələrinin birində piyadalarin hərəkətinə maneə yaradan konstruksiya prosesə Dövlət Şəhərsalma və Arxitektura Komitəsinin müdaxiləsindən sonra səki üzərindən götürülüb.

Hər şey Feysukda şəhər rəhbərliyinin səhlənkarlığından bəhs edən və böyük dəstək alan statusdan sonra başladı.

Rəsmi məlumata görə, DŞAK-ə Xırdalanda Zərifə Əliyeva küçəsində – Heydər Əliyev parkının yaxınlığında piyada səkisi üzərində ticarət köşkünün quraşdırılması ilə bağlı yerli sakinlərdən şikayət daxil olub.

Mütəxəssislər dərhal yerində baxış keçirilərək müəyyən ediblər ki, ticarət köşkü qeyd edilən ünvanda səki üzərində şəhərsalma qanunvericiliyinə və normalarına riayət edilmədən, zəruri razılaşdırılma və icazə prosedurları həyata keçirilmədən quraşdırılıb, bununla da piyadaların gediş-gəlişinə maneə yaradır.

Bununla əlaqədar Komitə Abşeron rayon İcra Hakimiyyətinə müraciət edib və Azərbaycan Respublikası Prezidentinin 24.11.2014-cü il tarixli 375 nömrəli Fərmanı ilə təsdiq olunmuş “Dövlət şəhərsalma nəzarətinin həyata keçirilməsi Qaydaları”nın tələblərinə uyğun olaraq qanunsuz tikinti-quraşdırma işləri dayandırılıb.

“DŞAK proseslərinə ictimai nəzarətin xüsusi əhəmiyyətini vurğulayır, qeyri-qanuni tikinti-quraşdırma işlərinin qarşısının alınması üçün təşəbbüskarlığa və vətəndaş borcunun yerinə yetirilməsinə görə sakinlərə təşəkkür edir”, - deyə qurumun məlumatında qeyd olunub.--08--