ARDNF-nin 2017-ci il büdcəsinə yenidən baxılıb

Bakı/05.10.17/Turan: Dövlət başçısı İlham Əliyevin 4 oktyabr tarixli sərəncamı ilə https://goo.gl/P23yMh Dövlət Neft Fondunun 2017-ci il büdcəsinin parametrlərinə yenidən baxılıb. Neftin qiymət artımından gəlirləri Türkiyədəki "Star" neft emalı zavodunun tikintisinin maliyyələşdirilməsinə yönəltmək planlaşdırılır. ARDNF-nin büdcəsinin gəlirlər hissəsi 8 mlrd 370,5 mln manatdan 10 mlrd 813,8 mln manata artırılıb. Fondun xərcləri 759,1 mln manat artırılıb. Bunun 744 mln manatı Türkiyədə neft emalı zavodunun tikintisinin maliyyələşdirilməsinə yönəldiləcək. Qaçqınların və məcburi köçkünlərin sosial-məişət və məskunlaşma məsələləri ilə bağlı bəzi tədbirlərin maliyyələşdirilməsinə 15 mln manat ayrılıb.

Neft-qaz layihələrində Azərbaycanın payının satışından xalis gəlirlər 9 mlrd 826,2 mln manat olacaq. Bu, ilin əvvəlindəki proqnozdan 30,1% çoxdur. ARDNF dövlət vəsaitlərinin idarə edilməsindən 963,9 mln manat əldə edəcəyini gözləyir. Bu, proqnozdan 165 mln manat çoxdur. Fondun başqa gəlirlərində də artım gözlənilir.

1 iyul 2017-ci il üçün ARDNF-nin aktivləri 34 mlrd 70,9 mln dollar olub. Bu, ilin əvvəlindəkindən 4,9% çoxdur. 08D