Moody's dörd bankın reytinqini endirib

Bakı/16.06.17/Turan: Moodys Investors Service beynəlxalq reytinq agentliyi dörd Azərbaycan bankının kredit və uzunmüddətli depozit reytinqini endirib.

Agentlik "Xalq Bank"ın reytinqini b2 səviyyəsindən b3 səviyyəsinə, "Bank Respublika"nın reytinqini B2-dən B3-ə, "Bank of Baku"nun reytinqini B3-dən Caa1, "VTB Bank" (Azerbaijan)nın reytinqini B2-dən B3-ə endirib.

Moodys eləcə də "Xalq Bank"ın kredit qabiliyyəti reytinqini b3-dən caa1-ə, "Bank Respublika"nın reytinqini b2-dən b3-ə, "Bank of Baku"nun reytinqini b3-dən caa1-ə, "VTB Bank" (Azerbaijan)ın reytinqini caa1-dən caa3-ə endirib.

Moodys bu bankların reytinqi üzrə mənfi proqnozu saxlayıb. "Reytinq hərəkətləri bank sektorunda uzun müddətdir hökm sürən əlverişsiz şərait və milli valyutanın devalvasiyasının neqativ təsirləri, o cümlədən aktivlərin keyfiyyətinin xeyli pisləşməsi, qaytarılmayan kreditlərə görə yaranan ziyan və digər amillər bu bankların göstəricilərini pisləşdirib", - deyə məlumatda bildirilir.

Moodys hesab edir ki, Azərbaycan banklarına təzyiqlər bundan sonra da qalmaqda davam edəcək. Bu, kreditləşmə perspektivləri və ziyan, rezervlərə düşən böyük yük və əlavə rekapitalizasiyanı tələb edən sərt nizamlama, dollarlaşma səviyyəsinin yüksək olaraq qalması ilə bağlıdır.

"Perspektivdə bu bankların depozit reytinqi neqativ qiymətləndirilir, problemli kreditləri 25% artıb. "Bank Respublika"nın AMB rəhbəri E.Rüstəmova məxsus olduğu deyilir, hətta ona məxsus bank çətinliklə üzləşib".

"Hər bir ölkədə banklar iqtisadiyyatın qan damarı sistemidir. İndi qan dövranı pozulub, iqtisadiyyat reanimasiyadadır, şüurunu itirmək üzrədir və çökəcək - yaranan vəziyyətin kritik olduğunu qalstuklu və kreslolu məmurlara izah etmək üçün daha sadə və anlaşıqlı dil budur. Yəni ölkədə Formula- 1 keçirilməsi ürək problemi olan şəxsin kreativ toy rəqsi etməsinə bənzəyir. Əvvəlcə müalicə olunmaq, sonra toyda rəqs etmək lazımdır", - deyə iqtisadçı Natiq Cəfərli Turan-a bildirib.

"Xalq Bank" bank lisenziyasını 30 dekabr 2004-cü ildə alıb və 5 aparıcı bankdan biridir. Səhmdarları 3 hüquqi şəxsdir.

"Bank Respublika" 1992-ci ildə yaradılıb və ölkənin 10 aparıcı bankından biridir. Onun səhmdarları arasında DEG Almaniya İnvestisiya Korporasiyası da var. Bankın səhmlərinin 84%-i Natiq Quliyevə ailə üzvlərinə məxsusdur.

"Bank of Baku" 1994-cü ildə yaradılıb və 10 aparıcı bankdan biridir.

2008-ci ildə AMB Rusiya "Vneştorqbank"ının "AF-Bank"ın səhmlərinin 51%-i alması üzrə əqdi təsdiq edib. Qalan 48,99% "AtaHolding"ə, 0,01% fiziki şəxsə məxsusdur.-0--