160 neftçi dənizdə köhnə gəmidə qalıb

Bakı/31.12.20/Turan: 160 neftçi gəmidə qalıb, kapitan onları "Neft daşları" yatağına işə aparmaqdan imtina edir. Bu barədə Turan-a Neftçilərin Hüquqlarını Müdafiə Komitəsinin rəhbəri Mirvari Qəhrəmanlı bildirib.

Pandemiya ilə əlaqədar neftçilər işdən öncə bir həftə Atletlər Kəndində karantində olublar.

"Bu gün səhər karantindən sonra 160 nəfərdən ibarət növbəti qrupu “Neft Daşları"na göndərmək üçün limana gətiriblər. Saat 11.30-da onları "General Əsədov" gəmisinə buraxıblar. Bir saat sonra trap qaldırılıb. Lakin gəmi hələ də yerindədir. Kapitan neftçilərə bildirib ki, gəmi gecə saat 1-dən sonra dənizə yola düşəcək. Sərnişinlərə başqa heç bir məlumat verilmir", - M.Qəhrəmanlı dekabrın 31-də saat 16.50-də Turan agentliyinə bildirib.

O qeyd edib ki, bu, "General Əsədov" gəmisinin kapitanının neftçiləri gecəyarısına qədər saxlaması ilə bağlı ilk hadisə deyil.

«2-3 ay əvvəl də analoji hadisə baş vermişdi. O zaman kapitan bildirmişdi ki, gəmi gecə vaxtı limana yan ala bilmir.  Ona görə də təyinat yerinə günün işıqlı vaxtı getməlidir. O vaxt neftçiləri düşürüb bir neçə saat konteynerlərdə saxlamışdılar. İndi də 6 saatlıq yolu nəzərə alsaq, neftçilər 20 saata yaxın ac-susuz  gəmidə qalacaqlar ", - M.Qəhrəmanlı deyib.

O, SOCAR və "Xəzər Dəniz Gəmiçiliyi" QSC rəhbərlərini təcili tədbirlər görməyə çağırıb.

M.Qəhrəmanlının fikrincə, neftçilərlə baş verə biləcək mümkün fövqəladə hallara, neftçilərin sağlamlığına və təhlükəsizliyinə görə məhz onlar məsuliyyət daşıyacaqlar.

Hüquq müdafiəçisi hesab edir ki, neftçilərin daşınması üçün yeni gəmilərin alınmasının vaxtıdır. –06B-