Amerika təşkilatı azad edilmiş ərazilərdə minatəmizləmə tədqiqatları aparıb

Bakı/19.02.21/Turan: Amerika Birləşmiş Ştatlarında mina və partlamamış hərbi sursatların təmizlənməsi üzrə fəaliyyət göstərən tanınmış və ixtisaslaşmış təşkilatlarından biri olan Tetra-Tech şirkətinin nümayəndə heyəti işğaldan azad edilmiş ərazilərdə ilkin tətqiqatların aparılması məqsədi ilə fevralın 12-dən 19-dək Azərbaycana səfər edib.

Azərbaycan Minatəmizləmə Agentliyinin məlumatına görə, fevralın 17-də sahə üzrə ilkin təəssüratları və qeydləri bölüşmək üçün nümayəndə heyəti Minatəmizləmə Agentliyində görüş keçirib. Görüşdə mövcud vəziyyət və gələcək əməkdaşlığın effektiv yolları ilə bağlı müzakirələr aparılıb.

Döyüşlər gedən ərazilərin ermənilər yaşayan hissəsində Rusiya Müdafiə Nazirliyi, Azərbaycan Ordusunun nəzarətində olan hissəsində isə Azərbaycan Minatəmizləmə Agentliyi, Azərbaycan,Türkiyə və Rusiya Müdafiə Nazirliklərinin minaaxtaranları işləyir.

Hərbi ekspertlər dəfələrlə bəyan ediblər ki, minaların axtarışı və zərərsizləşdirilməsi illərlə davam edə bilər. Onların qiymətləndirmələrinə görə, münaqişə ərazisində 50 mindən 100 minədək mina basdırılıb. Ekspertlər minaların ən çox Tərtər, Ağdam və Füzuli rayonlarının ərazisində olduğunu düşünür.

Bir müddət əvvəl Azərbaycan prezidenti İlham Əliyev bildirib ki, düşmən təkcə təmas xəttinə yaxın olan əraziləri yox, şəhərləri, yolları, önəmli strateji yüksəklikləri də minalayıb. O qeyd edib ki, azad edilmiş torpaqlarda minatəmizləmə işləri birinci dərəcəli vəzifədir. -03B06-