Bayden: “ABŞ və müttəfiqləri Rusiyanın təcavüzünü dəf etmək üçün Ukraynaya hər şey verəcəklər”

Vaşinqton/04.05.22/Turan: Çərşənbə axşamı ABŞ prezidenti Co Bayden raket zavoduna gedib və ukraynalılara Rusiyanın təcavüzünü dəf etməkdə kömək edən “Javelin” tank əleyhinə raket istehsalına görə işçilərə təşəkkür edib, Turan-ın Vaşinqton müxbiri bildirib.

Rusiya Ukraynaya hücum etdiyi vaxtdan ABŞ Ukraynaya təhlükəsizlik sahəsində 3 milyard dollardan çox yardım göndərib. Bayden deyib ki, bu vəsait azadlığın və demokratiyanın müdafiəsinə birbaşa yatırımdır.

"Ukraynalıların mübarizəni davam etdirməsinin və onu Rusiya üçün strateji uğursuzluğa düçar etməsinin səbəbi ABŞ-ın müttəfiqləri və tərəfdaşları ilə birlikdə onların arxasında dayanmasıdır", - o əlavə edib.

“Biz hər gün xəbərlərdə Vladimir Putinin rəhbərliyilə Rusiya qoşunlarının Ukraynada törətdiyi vəhşilikləri və hərbi cinayətləri görürük. Və bu, həqiqətən ağrılıdır”, -prezident deyib.

"Öz gələcəyi uğrunda mübarizə aparan cəsarətli ukraynalıların özlərini qəddar Putin müharibəsindən qorumaq üçün silah, hərbi sursat və texnikaya malik olması üçün ABŞ müttəfiqləri və tərəfdaşları ilə birlikdə əlindən gələni edir", - Bayden vurğulayıb.

Ağ Evin mətbuat xidmətinin məlumatına görə, Alabamadakı Lockheed Martin müəssisəsi hər il minlərlə “Javelin” tank əleyhinə raket kompleksi istehsal edir. ABŞ hökuməti və onun müttəfiqləri Ukraynaya 5500 belə tank əleyhinə sistem göndərib. -25B-