Əliyev-Paşinyan görüşü ərəfəsində Ermənistan siyasətində panik əhval-ruhiyyə

Bakı/10.01.20/Turan:  Yanvarın 9-da Yerevanda "Vətənin xilası uğrunda hərəkat" antipaşinyan siyasi blokunun nümayəndələri XİN rəhbəri Ara Ayvazyanla görüşərək 11 yanvar danışıqlarında Əliyevə güzəştə  getmək niyyətində olan Paşinyana mane olmağı tələb ediblər.

Müxalifətçilər Vazgen Manukyan, İşxan Saqatelyan və Artur Vanesyan xarici işlər naziri ilə görüşüblər. Ermənistan mətbuatı nazirlikdə baş tutan söhbətin nəticələri barədə məlumat verməyib.

Bundan öncə müxalifətdən hökumət başçısı postuna namizəd Vazgen Manukyan açıq şəkildə XİN, MTX və Ermənistan SQ Baş Qərargah rəisini baş nazir Nikol Paşinyan tərəfindən dövlət əleyhinə qərarların qəbulunun qarşısını almağa çağırıb. O bildirib ki, yanvarın 11-də Paşinyanın İlham Əliyevlə görüşü planlaşdırılır. Bununla əlaqədar geniş siyasi və ictimai dairələr narahatlıq və həyəcan içindədir. 

Teleqram-kanalların məlumatına görə, yanvarın 11-də baş nazir Nikol Paşinyan Moskvaya səfər etmək niyyətindədir. Orada Azərbaycan prezidenti İlham Əliyevlə görüşəcək, sənədlər imzalayacaq. Bu mənbələrin məlumatına görə, həmin sənədlərdə Ermənistanın bəzi ərazilərinin Azərbaycana verilməsi, Azərbaycanı Naxçıvanla birləşdirən dəhlizin açılması, həmçinin erməni qoşunların Dağlıq Qarabağdan çıxarılması əksini tapacaq. Hələlik hökumət başçısının Rusiyaya qarşıdakı səfəri barədə rəsmi məlumat yoxdur.

Paşinyanın postu erməni cəmiyyətini narahat edir. Paşinyan bu postda tezliklə baş tutacaq danışıqlarda öz niyyətini bölüşür. Nikol Paşinyan yazıb:
«1.Bəyanatın 8-ci maddəsinin  tam  həyata keçirilməsi. Müvafiq olaraq əsirlərin, girovların və tutulan digər şəxslərin, habelə həlak olanların cəsədlərinin tam mübadiləsi olmalıdır. Hərbi əməliyyatlar zonasında geniş axtarış-xilasetmə işlərinin aparılması da bizim üçün vacibdir.

2. Regionun bütün iqtisadi və nəqliyyat infrastrukturunun açılması, bu, həm yükdaşımaları, həm Ermənistanın Azərbaycan vasitəsilə Rusiya və İran İslam Respublikası istiqamətində nəqliyyat əlaqələri, həm də Azərbaycanın Ermənistan ərazisilə Naxçıvan şəhərinə yükdaşımaları və nəqliyyat əlaqələri deməkdir.

Bir daha o faktı diqqətə çatdırıram ki, 10 noyabr bəyanatında "Mehri" və ya Ermənistan Respublikasının digər hər hansı digər ərazisi ilə bağlı "dəhliz" sözü yoxdur.

Ermənistandan Rusiyaya və Azərbaycandan Naxçıvana əlaqə marşrutlarının seçilməsi ayrıca müzakirə mövzusudur və onun effektivliyinin artırılması üçün vacib şərt əsirlərin, girovların, digər saxlanılan şəxslərin, həlak olanların cəsədlərinin mübadiləsi, həmçinin itkin düşənlərin axtarışı üzrə işlərin həcminin və səmərəliliyinin artırılmasıdır, - Paşinyan sosial şəbəkədə yazıb.

Moskvada Paşinyanı Rusiya ermənilərinin qeyri-dost münasibəti gözləyir. Rusiya Erməniləri İttifaqının rəhbəri Ara Abramyan Ermənistanın baş naziri Nikol Paşinyana müraciət edərək Moskvaya getməyib istefa verməyə çağırıb. Belə ki, qeyri-rəsmi məlumata görə, Moskvada Qarabağa dair sənəd imzalanacaq.

O hesab edir ki, Paşinyanın Facebook-da dərc etdiyi üçtərəfli bəyanatın prioritet nöqtələri Moskvada imzalanacaq hansısa yeni sazişin əsasını təşkil edəcək.
Dövlət başçılarının Moskva görüşü ərəfəsində yanvarın 9-da Ermənistan Respublikası Milli Təhlükəsizlik Xidmətinin direktoru Armen Abazyan Azərbaycan Respublikası Dövlət Təhlükəsizliyi Xidmətinin direktoru Əli Nağıyev ilə işgüzar görüş keçirib. Bu barədə ER MTX mətbuat xidməti məlumat verib. Görüş ER Ararat vilayətinin Erasx icmasına bitişik sərhədanı neytral zonada keçirilib.
Görüş zamanı əsirlərin dəyişdirilməsi və itkin düşənlərin axtarışı ilə bağlı məsələlər müzakirə olunub. Bu sahədə iki qurumun əlaqələri davam edir, məlumatda bildirilir.

Erməni teleqram- kanallarında Ermənistan və Azərbaycan MTX rəhbərlərinin dünən Naxçıvan sərhəddində keçirilən gizli görüşünün bəzi detalları yer alıb. Bu məlumatlara görə, ermənilərin məskunlaşdığı Azərbaycana məxsus Kərki kəndi (Tiqranaşen) 5 gün ərzində Azərbaycana veriləcək.0—