Erməni tərəfi yüzlərlə əsgərinin Şuşa ərazisində əsir düşdüyünü bildirir

Bakı/16.12.20/Turan:  Ermənistanın Şirak vilayətinin onlarla sakini Qarabağın Şuşa ərazisində Xin Şen (Böyük Qaladərəsi) kəndinin yaxınlığında mühasirədədir və ya artıq əsir düşüb, erməni mənbələri bildirib. Əsasən Şirak vilayətinin sakinləri bildirirlər ki, bu bölgədən olan könüllülər üç gün mühasirədə qalıblar. Dekabrın 15-də Azərbaycan tərəfindən yayılan videoda həmin dəstənin necə əsir düşdüyü görünür.

Mühasirəyə alınanların əsir düşənlərin əksəriyyəti Ermənistanın Şirak vilayətinin Sarapat və Aşotsk kəndlərinin sakinləridir. "Söhbət Şirak vilayətindən 150 könüllüdən və onlarla vəzifəli şəxsdən gedir", - “Sputnik Armenia” bildirib. Ermənistandan digər bir qrup Xsaberd kəndi (Çalaqqala) yaxınlığında əsir düşüb. 

Əvvəllər bütün bu "könüllülər" videolara çəkilirdilər və Laçın yolu boyunca öz postlarının fotolarını İnternetdə nümayiş etdirirdilər, Rusiya sülhməramlılarının onların yanında durması və onlara mane olmaması ilə öyünürdülər. Ancaq indi azərbaycanlı hərbçilərin onları mühasirəyə aldığını və yalnız dinc əhalini buraxdığını, hərbçiləri isə əsir götürdüyünü xəbər verə biliblər.

Azərbaycan Müdafiə Nazirliyi və digər güc strukturları bu məlumatları hələlik şərh etməyiblər.

Qeyd edək ki, 10 noyabr tarixli üçtərəfli bəyanata əsasən bütün erməni qoşunları Dağlıq Qarabağ da daxil olmaqla, işğal olunmuş ərazilərdən dekabrın 1-nə qədər çıxmalı idi. Ancaq bu olmadı. Bundan əlavə, Ermənistan Silahlı Qüvvələri bir neçə təxribat törədərək yuxarıda adları çəkilən kəndlərin yaxınlığında bir neçə azərbaycanlı hərbçini və mülki şəxsləri öldürüb və yaralayıb. Azərbaycan antiterror əməliyyatı keçirmək və həmin məntəqələri öz nəzarətinə götürmək məcburiyyətində qalıb.-02D-