İSESCO nümayəndələrinin azad edilmiş ərazilərdə gördükləri barədə dedikləri

Bakı/12.01.21/Turan: Bu gün Azərbaycanın azad edilmiş ərazilərinə baş çəkən İSESCO-nun (İslam Dünyası Elm, Təhsil və Mədəniyyət Təşkilatı) nümayəndə heyəti erməni işğalı zamanı tarixi və dini abidələrə qarşı vandalizm faktlarını qeydə alıb.

İSESCO-un baş direktoru Səlim bin Məhəmməd əl-Malikin sözlərinə görə, missiya üzvləri gördüklərindən şok olublar.

“Bütün kəndlər, qəsəbələr, tarixi və dini abidələr dağıdılıb. Məscidlərin və dini məbədlərin dağıdılması, təhqir edilməsi, onlara qarşı vandalizm yolverilməzdir. Dini ziyarətgahlara hörmətlə yanaşmaq, onları qorumaq lazımdır”, deyə əl-Malik qeyd edib.

O, bütün dağıdılmış abidələrin bərpa ediləcəyindən əminliyini ifadə edib. İnsanların dini inancları ayrı-seçkiliyə məruz qalmamalıdır, hər bir dinin ibadətxanalarına isə dövlət səviyyəsində, regional və qlobal səviyyədə hörmət göstərilməlidir.

İstənilən müharibə dağıntılara gətirib çıxarır, o cümlədən müxtəlif obyektlər dağıdılır. “Amma din və mədəniyyət obyektlərinin, mədəni irs nümunələrinin məhv edilməsi yolverilməzdir”, deyə İSESCO baş katibi bildirib.

Azərbaycan İSESCO-ya sorğular göndərməlidir, bundan sonra müstəqil ekspertlər komitəsi ziyanı dəyərləndirəcək. Azərbaycanın mədəni irs abidələrinin Ümumdünya İslam İrsi Siyahısına daxil edilməsini nəzərə alaraq, İSESCO bu obyektləri və abidələri də mühafizə altına götürəcək, deyə əl-Malik bildirib. -06D-