KİV-ə Dövlət Dəstəyi Fondunun  əsasında “Azərbaycan Respublikasının Medianın İnkişafı Agentliyi” yaradılıb  

Bakı/12.01.21/Turan: Azərbaycan prezidenti İlham Əliyev bu gün Azərbaycanda media sahəsində islahatların dərinləşdirilməsi haqqında fərman imzalayıb.

Sənədə əsasən, Azərbaycanda Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun əsasında “Azərbaycan Respublikasının Medianın İnkişafı Agentliyi” publik hüquqi şəxs yaradılır. Ləğv edilən fondun icraçı direktoru Əhməd İsmayılov yeni yaradılan agentlikdə eyni vəzifəyə təyin edilib.

Prezident həmçinin agentliyin nizamnaməsini təsdiq edib.

Bu qurum medianın inkişafının dəstəklənməsi, media sahəsində mütəxəssislər hazırlanması və onların əlavə təhsilinin təşkili, audiovizual, çap, onlayn media subyektlərinin və informasiya agentliklərinin (bundan sonra – media subyektləri), habelə jurnalistlərin və digər media işçilərinin fəaliyyətinin, eləcə də media sahəsində yeni informasiya-kommunikasiya texnologiyalarının və innovasiyaların tətbiqinin stimullaşdırılması istiqamətində fəaliyyət göstərəcək.

Agentliyin idarəetmə orqanları dövlət başçısı tərəfindən təyin edilən altı üzvdən ibarət Müşahidə Şurası və icraçı direktordur.

Agentliyin nizamnamə fondu 285 405 manat ölçüsündə müəyyən edilib.

Agentlik dövlət başçısına tabe olacaq.

40 yaşlı İsmayılov hüquqşünas təhsili alıb, müxtəlif nazirliklərdə və idarələrdə, Heydər Əliyev Fondunda ekspert vəzifəsində işləyib, hakim Yeni Azərbaycan Partiyasının üzvüdür.

2020-ci ilin aprelində Azərbaycan prezidenti yanında KİV-in İnkişafına Dövlət Dəstəyi Fondunun icraçı direktoru vəzifəsinə təyin edilib. -06D-