Merkelin partiyasından olan deputat onu Azərbaycana səfəri zamanı müşaiyət edə bilməyəcək

Bakı/20.08.18/Turan: Azərbaycan hakimiyyəti Almaniya kansleri Angela Merkelin Xristian-Demokrat Partiyasından olan deputat Albert Vaylerin ölkəyə girişini qadağan edib. Bu barədə avqustun 20-də Bild qəzeti məlumat yayıb.

Rəsmi Bakının Vayleri "arzuolunmaz şəxs" elan etməsinin səbəbi onun 2014 və 2016-cı illərdə Azərbaycanın işğal edilmiş ərazilərinə səfər etməsi olub. İndi girişin qadağan edilməsi qərarı ən yüksək səviyyədə qəbul edilib, odur ki, Azərbaycan səfiri ilə bu barədə danışıqlar nəticəsiz qalıb, deyə Bild yazır.

Almaniyanın Cənubi Qafqaz ölkələri ilə münasibətlər üzrə parlament qrupunun sədr müavini Vayler avqustun 24-dən Merkeli Gürcüstan, Ermənistan və Azərbaycan səfərlərində müşaiyət etməli idi.

Vayler regionda vəziyyətlə bağlı narahatlığını bildirib. O, səfərdən imtina etmək niyyətindədir, deyə Deutsche Welle yazır. -06D--