Putin prioritetləri müəyyən edib: “Sülhməramlıların rolu, sərhədlərin demarkasiyası, humanitar və mədəniyyət problemləri (yenilənib)

Moskva/11.01.21/Turan: Görüş zamanı Putin Əliyevə və Paşinyana Dağlıq Qarabağda nizamlanmanın əsas istiqamətləri üzrə yeni addımların müzakirəsini təklif edib.

"Bu gün ilk növbədə, ötən il noyabrın 9-da qəbul edilmiş birgə bəyanatda qeyd olunan nizamlanmanın əsas istiqamətləri üzrə növbəti addımların müəyyənləşdirilməsi vacib olardı. Rusiyanın sülhməramlı kontingentinin fəaliyyəti, demarkasiya xətlərinin dəqiqləşdirilməsi, humanitar problemlərin həlli, mədəni irs obyektlərinin mühafizəsi ilə bağlı məsələləri nəzərdə tuturam", - Putin deyib.

Rusiyalı lider qeyd edib ki, "regionda iqtisadi, ticarət və nəqliyyat əlaqələrinin açılması, sərhədlərin açılması" məsələsi xüsusi diqqətə layiqdir. "Ehtimal olunur ki, bu məsələlərlə Rusiya, Azərbaycan və Ermənistan baş nazirlərinin müavinlərinin sədrliyilə xüsusi üçtərəfli işçi qrupu məşğul olacaq”, - Putin deyib.

O ümid etdiyini bildirib ki, danışıqlar "işgüzar şəraitdə keçəcək və regionda davamlı sülhün, təhlükəsizliyin və ardıcıl sosial-iqtisadi inkişafın təminatına xidmət edəcək.

Prezident bildirib ki, Qarabağa dair razılaşmalar ardıcıl olaraq həyata keçirilir, bu, münaqişənin ədalətli əsasda həlli üçün zəmin yaradır. "Bu gün üçtərəfli razılaşmaların ardıcıl olaraq həyata keçirildiyini məmnunluqla qeyd etmək olar. Bizim fikrimizcə, bu, köhnə münaqişənin həm erməni, həm də Azərbaycan xalqlarının maraqlarına uyğun ədalətli əsasda uzunmüddətli və tam formatlı həlli üçün lazımi şərait yaradır", -  o bildirib.

Putin qeyd edib ki, Rusiya hər üç ölkəni birləşdirən tərəfdaşlıq və mehriban qonşuluq münasibətlərini yüksək qiymətləndirir. O, Rusiyanın aktiv vasitəçilik fəaliyyətini müsbət qarşıladıqlarına görə Əliyev və Paşinyana təşəkkür edib.

"Biz sizinlə daim əlaqədə idik, kompromis axtarırdıq. Məhz bizim ümumi səylərimiz nəticəsində, intensiv, o cümlədən, xatırlayırsınız, gecə, telefon danışıqlarından sonra noyabrın 9-da sizinlə imzaladığımız üçtərəfli bəyanat razılaşdırıldı", - rusiyalı lider bildirib.

Putin vurğulayıb ki, Rusiya bütün hərəkətlərində ATƏT-in Minsk Qrupunda əldə olunmuş əsas nailiyyətlərə əməl etməyə çalışıb. Onun sözlərinə görə, Rusiya tərəfi öz fəaliyyətini Minsk Qrupunun tərəfdaşları və sədri ilə tutuşdurmaqda davam edir.

"Hazırda regionda vəziyyət sakitdir. Məcburi köçkünlərin və qaçqınların təhlükəsiz qayıtması üçün çox işlər görürük. 14 noyabrdan (2020 - ci il) Qarabağa 48 mindən artıq insan qayıdıb", - Putin bildirib. Rusiyanın vasitəçiliyilə əsirlərin və həlak olanların cəsədlərinin mübadiləsi aparılıb. Bundan əlavə, beynəlxalq humanitar mərkəz uğurla fəaliyyət göstərir. Bu mərkəz çərçivəsində "yaşayış məntəqələrində normal həyatın qurulması, dağıdılmış infrastrukturun bərpası, tarixi, dini və mədəniyyət abidələrinin qorunması ilə bağlı vacib məsələlər" həll olunur. -02D-

*   *   *

2021 Yanvar 11 (Bazar ertəsi) 16:16:26

Putin-Əliyev-Paşinyan görüşü başlayıb

Moskva/11.01.21/Turan: Bakı vaxtı ilə saat 15:00-da Moskvada Rusiya, Azərbaycan və Ermənistan rəhbərlərinin üçtərəfli görüşü başlayıb.

Putin Əliyev və Paşinyana Qarabağda nizamlanmanın əsas istiqamətləri üzrə yeni addımların müzakirəsini təklif edib. Qarabağla bağlı razılaşmalar ardıcıl olaraq həyata keçirilir, bu, münaqişənin ədalətli əsasda həllinə zəmin yaradır, TASS agentliyi Putindən sitat gətirib.

Onun sözlərinə görə, Dağlıq Qarabağda vəziyyət sakit olaraq qalır, artıq 48 min qaçqın bölgəyə qayıdıb. Putin bildirib ki, RF, Azərbaycan və Ermənistanın xüsusi üçtərəfli qrupu Qarabağda ticarət və iqtisadi əlaqələrin açılması məəslələrilə məşğul olacaq.

Görüş davam edir.02D-