Qarabağ Dirçəliş Fondu yaradılıb

Bakı/04.01.21/Turan: Prezident İlham Əliyev "Qarabağ Dirçəliş Fondu publik hüquqi şəxsin yaradılması haqqında" fərman imzalayıb.

Sənddə deyilir ki, Qarabağ Dirçəliş Fondu Azərbaycanın işğaldan azad edilmiş ərazilərinin bərpası və yenidən qurulması, habelə dayanıqlı iqtisadiyyata və yüksək rifaha malik regiona çevrilməsi istiqamətində həyata keçirilən tədbirlərə maliyyə dəstəyi göstərilməsini və sərmayələrin cəlb edilməsini, bu sahədə dövlət-özəl tərəfdaşlığının inkişafını təmin edəcək, eləcə də ölkə daxilində və ölkə xaricində zəruri təşviqat işlərini həyata keçirəcək

Fondun fəaliyyətinə ümumi rəhbərliyi və nəzarəti həyata keçirmək üçün Müşahidə Şurası yaradılıb. Fondun fəaliyyətinə cari rəhbərliyi 3 üzvdən – sədr və onun iki müavinindən ibarət İdarə Heyəti həyata keçirəcək.

Fondun vəsaitləri fiziki və hüquqi şəxslərin ianələri, qrantlar, qanunla qadağan olunmayan digər mənbələrdən formalaşacaq.

Dövlət başçısı fondun 9 nəfərdən ibarət müşahidə şurasını təsdiq edib. Müşahidə Şurasına iqtisadiyyat, ekologiya və təbii sərvətlər nazirləri, Qaçqınların və Məcburi Köçkünlərin İşləri üzrə Dövlət Komitəsinin sədri, Mili Məclisin deputatları və ictimai xadimlər daxildir.

Ermənistan-Azərbaycan münaqişəsi 1988-ci ildə başlayıb. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu ermənilərin nəzarətinə keçib.

Azərbaycan və Ermənistan Silahlı Qüvvələri arasında sentyabrın 27-də yenidən hərbi əməliyyatlar başlayıb. Azərbaycan Ordusu noyabrın 10-dək beynəlxalq tanınmış sərhədləri daxilində üç yüzdən çox yaşayış məntəqəsini, o cümlədən 5 rayonu, həmçinin Şuşa şəhərinə nəzarəti bərqərar etdikdən sonra Azərbaycan, Ermənistan və Rusiya hərbi əməliyyaların dayandırlıması barədə bəyanat imzalayıb. Bəyanata uyğun olaraq Azərbaycanın beynəlxlaq səviyyədə tanınmış sərhədləri daxilindəki ərazilər azad edilib.

Rəsmi məlumatlara görə, 30 ildən çox ermənilərin nəzarətində olan Azərbaycanın 900 yaşayış məntəqaində 150 min yaşayış evinin, 7 min ictimai binaların, 693 məktəbin, 855 uşaq bağçasının, 695 tibb məntəqəsinin və digər çoxsaylı tikililərin əksəriyyəti dağıdılıb. -03-