20 yanvar faciəsi dünyaya nəyi göstərdi? – Etibar Məmmədov “Çətin sual" qarşısında

Bakı/20.01.22/Turan:  Azərbaycanda ümummili hüzn günü qeyd olunur. 1990-cı il yanvarın 19-dan 20-ə keçən gücə sovet ordusu tərəfindən Bakı küçələrində qətlə yetirilən Azərbaycan vətəndaşları bu gün ehtiramla yad olunur.   32 il əvvəl sovet ordusu hissələrinin Bakıya daxil olması dinc əhali arasında çoxsaylı tələfata səbəb olub. 1990-cı il yanvarın 19-dan 20-nə keçən gecə o zamankı SSRİ rəhbərliyinin göstərişi ilə Bakıya 35 minlik ordu korpusu yeridilib. Aksiyada məqsəd Azərbaycanda kommunist rejimini xilas etmək və milli-azadlıq hərəkatını boğmaq idi.

Bu əməliyyat SSRİ Müdafiə Nazirliyi, DİN və DTK tərəfindən hazırlanaraq həyata keçirilmişdi və "Zərbə" adlanırdı. Əməliyyatda əsas rolu "ALFA" xüsusi təyinatlı qrup və SSRİ DTK-nın təxribat qrupları oynayırdı.

Qanlı hadisələrdə 134 mülki şəxs öldürülüb, 700-dən çox adam yaralanıb.

Qeyd edək ki, bu il rəsmi təbliğatda faciənin əsas günahkarları kimi keçmiş SSSR-nin rəhbərləri, əsasən prezident Mixail Qorbaçovun adı çəkilir. Eyni zamanda respublikanın o zamankı rəhbərliyinin ünvanına tənqidlər azalıb. Onu da bildirək ki,  keçmiş SSRİ və Azərbaycan SSR-nin rəhbərliyindən heç kim yanvar faciəsinə görə məsuliyyətə cəlb olunmayıb.

Milli azadlıq hərəkatının fəallarından olmuş Etibar Məmmədov Kamran Mahmudovun təqdimatında yayımlanan “Çətin sual” verilişində 32 il əvvəl baş vermiş  hadisələr barədə danışır.