12-14 sentyabr hadisələri cəmiyyəti bölüb

Bakı/16.09.22/Turan: Azərbaycan-Ermənistan sərhədində baş verən hadisələr cəmiyyətdə birmənalı qarşılanmır. 44 günlük müharibə zamanı cəmiyyətin böyük əksəriyyəti Azərbaycan hökümətinin diplomatik və hərbi addımlarını dəstəkləyirdisə, hazırda mövqelər daha çox bölünüb.

Azərbaycan Müdafiə Nazirliyinin sentyabrın 12-də yaydığı məlumata görə, Ermənistan silahlı qüvvələrinin bölmələri Azərbaycan-Ermənistan dövlət sərhədinin Daşkəsən, Kəlbəcər və Laçın istiqamətlərində genişmiqyaslı təxribat törədib. "Bu əməllərin qarşısının dərhal alınması məqsədilə bölmələrimiz tərəfindən görülən təxirəsalınmaz tədbirlər nəticəsində döyüş toqquşması baş verib".

Tarixçi Altay Göyüşov hesab edir ki, prezident İlham Əliyev Azərbaycanı dünyaya təcavüzkar dövlət kimi qəbul etdirə bilər. "Bundan isə təkcə o yox, hamımız ziyan görəcəyik. Necə ki, Putinin təcavüzkarlığından bu gün bütün Rusiya vətəndaşları ziyan görür".

Onun fikrincə, İlham Əliyevin Zəngəzur, İrəvan tipli irridentizminə cəmiyyət onun özündən daha çox inanır, dəstəkləyir. "Şəxsən mənə İrəvan, Zəngəzur lazım deyil və Ermənistana qarşı gecəki təcavüzü birmənalı olaraq pisləyirəm. Mənim görüşümə lazım olan əlavə torpaq, ərazi, yekəlmək istəklərini kənara ataraq elə indiki oturduğumuz yerlərdə ədalətli sistem quraraq ləyaqətlə yaşamağımızdır".

Professor qeyd edib ki, tərəqinin də yolu budur. "Çoxluq belə düşünməsə, nə özü, nə uşaqları bir gün görəcək".

Azərbaycan Xalq Cəbhəsi Partiyasının sədri Əli Kərimli isə son 2 gün ərzində Azərbaycan-Ermənistan sərhədində şəhidlərin sayı ilə bağlı sual verir. "Acından ölən" düşmənlə cəmi bir neçə saatlıq döyüşdə nəyə görə bu qədər çox - 50 nəfər şəhid vermişik? Ordunun savaş zamanı az itki verməsi üçün nələr lazımdır?".

Siyasətçi hesab edir ki, ilk növbədə ordu daha müasir və dəqiq silahlarla və qoruyucu vasitələrlə təchiz olunmalıdır. "İkincisi, peşəkar hərbiçilər yetişdirilməlidir. Savaşda peşəkarlar iştirak etməlidir. Üçüncüsü, hərbiçilər çox təlim görməlidir. Təlim zamanı döyüş sursatı qıtlığı yaşanmamalıdır. Məşhur sərkərdənin dediyi kimi, təlimdə çox tər tökülməlidir ki, döyüşdə az qan tökülsün".

Partiya sədrinin fikrincə, ordu effektiv idarə olunmalıdır. "Əməliyyat planının gizliliyi təmin edilməlidir. Ordu rəhbərlərin avantürasına qurban verilməməlidir".

O qeyd edib ki, 50 şəhidin 29 nəfəri zabit və gizir olduğu üçün, deməli, döyüşdə iştirak edən hərbiçilərin hərbi hazırlığı da yüksək olub. ""Hərbiçilərimiz hazırlıqsız olub" versiyası tam istisna olunur. İndi sual budur: Azərbaycan ordusunun nəyi çatışmayıb və ya nə səbəb olub ki, psixoloji cəhətdən zəif, silah, texnika baxımından geridəqalmış, maddi baxımdan kasıb ölkənin ordusu ilə bir neçə saatlıq döyüşdə 50 nəfər şəhid vermişik və məntiqlə ehtimal etmək olar ki, bundan 3-4 dəfə artıq da yaralı olub?".

AXCP sədri hesab edir ki, bu qədər itki heç nə əldə edilmədən verilib. "Hakimiyyət susmaqla bu sualları unutdura bilməz. Başda İlham Əliyev olmaqla, hökumət bu suallara cavab, millətə izahat verməlidir".

Müsavat Partiyasının başqanı Arif Hacılı da son hadisələrin məqsədini və nəticəsini sorğulayır. "Bir gündə 50 şəhid verdik. Məqsəd nəymiş? Nəticə nədir? Biz bilmirik. Bizim bunu bilmək haqqımız yoxdur. Nəyi, nə vaxt, necə və nə üçün etməyi yalnız O bilir. Bizə demir. Çünki, kimə nəyi, nə vaxt, necə deməyi və ya deməməyi də yalnız O bilir"

Partiya başqanı qeyd edib ki, minlərlə əsgər anası, ailəsi, övladı ağır stress keçirib, sağlamlığını, həyatının illərini itirib. "Faciə baş verib. Ölkədə matəm elan edilməlidir".

Milli Məclisin deputatı Rüfət Quliyev isə hesab edir ki, son hadisələr zamanı Azərbaycan tərəfini ittiham edənlər ya dediklərini anlamır, ya da mahiyyətcə antipoddular. "Üçüncü variant – bu adamlar antimilliyətçilərdir. Yəni bizim beynəlxalq və daxili siyasətimiz, bizim qələbələrimiz, Qarabağ və Zəngəzur regionlarının qaytarılması ilə bağlı hərbi doktrinamız bu adamları qıcıqlandırır. Onlar erməni dəyirmanına su tökür, erməni KİV-ləri də bu alovlu opportunistləri tərifləyir".

Quliyevin sözlərinə görə, prezident İlham Əliyevin siyasəti Qarabağ və Zəngəzur regionları ilə bağlı məsələnin axıra kimi həll edilməsinə yönəlib. "Çalışılır ki, Xankəndidə yaşayan ermənilər qalıb və Azərbaycan vətəndaşlığını qəbul edib, tamhüquqlu vətəndaşlar kimi yaşasınlar. Ermənistana 5 bənddən ibarət sülh müqaviləsini təklif edirik. Biz müharibələri başlamamışdıq və heç vaxt başlamayacağıq. Biz Qarabağ regionundan deyil, artıq Ermənistandan bizim ərazilərə endirilən zərbələrə reaksiya veririk".

Turanın verdiyi xəbərə görə, sentyabrın 16-da Azərbaycan Müdafiə Nazirliyi itkilərin siyahısını yeniləyib – həlak olanların sayı 77 nəfərə çatıb. 0