14-15 iyul 2020-ci il nümayişinin iştirakçılarının işi üzrə məhkəmədə

Bakı/05.05.21/Turan: Mayın 5-də Bakı Apellyasiya Məhkəməsinin binasında Azərbaycan ordusuna dəstək üçün 2020-ci il iyulun 14-də keçirilən aksiya zamanı yaranmış insident faktı üzrə ittiham edilən şəxslərin cinayət işi üzrə məhkəmə prosesi şahid və zərərçəkənlərin ifadələri ilə davam etdirilib. Prosesə Səbayel Rayon Məhkəməsinin hakimi Ağamalı Qafarov sədrlik edib.

Məhkəməsi keçirilən qrupa Azərbaycan Xalq Cəbhəsi Partiyasının fəalları Məmməd İbrahim, Fuad Qəhrəmanlı, Ayaz Məhərrəmli, Bəxtiyar İmanov, Müsəlman Birliyi Hərəkatının 2 üzvü və digər 6 nəfər daxildir.

Azərbaycan Xalq Cəbhəsi Partiyasının Rəyasət Heyətinin üzvü Fuad Qəhrəmanlı bildirib ki, bugünkü prosesdə 8 nəfər şahid, 2 zərəçəkmiş ifadə verib.

“Şahidlərin və zərəçəkmişlərin ifadələri ittihamın saxtalığını bir daha üzə çıxardı. Şahidlərdən biri dedi ki, ona Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsində psixoloji təzyiq edilib ki, Fuad Qəhrəmanlı və Asif Yusiflinin əleyhinə ifadə versin. O bunu etməyib. Digər şahidlərin ifadələrindən də aydın oldu ki, əksəriyyəti polis idarəsində saxlanıldığı və ya inzibati həbsdə olduğu zaman ifadələri alınıb. Şahidlərin bir qismi bildirdi ki, aksiyada Asif  Yusifli ilə birgə olublar və orada Qarabağa azadlıq, torpaqlarımızın azad edilməsi şüarlarından başqa şüarlar səsləndirilməyib. Onlar aksiyada ittiham aktında yazılan Milli Məclisin tutulması, AZTV-nin tutulması ilə bağlı hər hansı ifadənin səsləndirilmədiyini dedi. Zərərçəkənlər isə bildirdi ki, hər hansı iddiaları yoxdur, itttiham edilən şəxsləri tanımırlar. Şahidlərin və zərərçəkmişlərin ifadələri bir daha prosesin qondarma mahiyyətini, gerçəkliyi əks etdirmədiyini, ittihamın hər hansı dəlilə söykənmədiyini göstərdi”, - Qəhrəmanlı qeyd edib.

Məhkəmə müdafiə tərəfinin və ittiham edilən şəxslərin prosesə əlavə şahidlərin dəvət edilməsi ilə bağlı vəsatətlərini qəbul edilib.

Mayın 19-da növbəti məhkəmə iclası keçiriləcək. 

Təqsirləndirilən şəxslər Cinayət Məcəlləsinin 186 (əmlakı qəsdən məhvetmə və ya zədələmə), 233 (ictimai qaydanın pozulmasına səbəb olan hərəkətlər təşkil etmə ) və 315-ci (hakimiyyət nümayəndəsinə zor tətbiq etmə) maddələri ilə günahlandırılır.

Bu cinayət işi üzrə 37 nəfər təqsirləndirilən, 22 nəfər zərərçəkən şəxs var. Ötən ilin noyabr-dekabr aylarında həbsdə saxlanılan təqsirləndirilən şəxslərin hamısı polisin nəzarətinə verilməklə sərbəst buraxılıb.

Təqsirləndirilən şəxslərdən 16 nəfəri Azərbaycan Xalq Cəbhəsi Partiyasının, 2 nəfəri Müsəlman Birliyi Hərəkatının, 1 nəfəri Azərbaycan Demokratiya və Rifah Hərəkatının fəalıdır. Təqsirləndirilənlərin arasında Naxçıvanın keçmiş daxili işlər naziri Siyavuş Mustafayev də var. Qalanları isə bitərəfdir.

2020-ci il iyulun 14-də Bakıda minlərlə insanın Ermənistan-Azərbaycan sərhəddində gedən döyüşlərə dəstək məqsədilə keçirdiyi yürüş-mitinq iyulun 15-də səhərə yaxın polis tərəfindən dağıdılıb. Aksiyanın dağıdılması zamanı polis su şırnaqlarından, gözyaşardıcı qazdan və dəyənəklərdən istifadə edib.

Belə ki, gecə saatlarında bir qrup aksiya iştirakçısı parlamentin binasına daxil olub, polis avtomobili aşırılıb. Bu zaman polis aksiyaçıları parlamentin binasından çıxarıb və polislə qarşıdurma yaranıb.

Yaranmış insidentlə bağlı cinayət işi qaldırılıb, çox sayda adam həbs edilib.

Rəsmi qurumlar həbs edilənlərin sayı barədə məlumat verməsə də hüquq müdafiəçiləri onların sayının yüzdən çox olduğunu güman edirlər. Onların çoxu inzibati qaydada cəzalandırılıb.

Azərbaycan Xalq Cəbhəsi Partiyasının məlumatına görə, Azərbaycan ordusunu dəstəkləmək məqsədilə iyulun 14-də keçirilən aksiya zamanı yaranan insident faktı üzrə qaldırılmış cinayət işi üzrə bu partiyanın 45 nəfər fəalı həbs edilib.

“Onlardan 16 nəfərinə qarşı ağır ittihamlar irəli sürülüb. 15 nəfər inzibati qaydada həbs edilib, 14 nəfər şahid qismində dindirilərək sərbəst buraxılıb”-  məlumatda qeyd edilir.

Azərbaycan Xalq Cəbhəsi Partiyası və bir sıra digər siyasi qurumlar həbsləri "siyasi sifariş" hesab edir.-03-