15 siyasi fəal aclığı davam etdirir, həkim Tofiq Yaqubluya baş çəkib    

Bakı/12.01.23/Turan: "Tofiq Yaqublu israrla aclığı davam etdirəcəyini bildirdi. Dünən, yanvarın 11-də xəstəxanaya köçürüldükdən sonra həyatı üçün vacib funksiyalara dəstək məsədi ilə müəyyən infuziya olunub. Hazırda səhhətində müəyyən stabillik var, təzyiqi normallaşıb. Bu gün həyatı üçün təhklükə yoxdur".

Bu barədə tibb elmləri doktoru Adil Qeybulla yanvarın 12-də Əjdər Məlikov adına 6 saylı xəstəxanada Tofiq Yaqubluya baş çəkəndən sonra bildirib.

Onun sözlərinə görə, Yaqublu aclığı davam etdirir.

"Hesab edirəm ki, onun həm yaşı, həm keçirdiyi xəstəliklər nəzərə alınmaqala, aclıq onun həyatı üçün təhlükə törədə bilər. Yaqublu həbsindən öncə cərrahi əməliyyata məruz qalıb və hələ tam reabilitasiya olunmayıb. Ona görə də hansısa tədbirlərin görülməsi zəruridir. Yəni onun həbsdən azad edilib, sonra müalicəsini intensiv davam etdirməsi və digər variantlar müzakirə mövzusu ola bilər. Hər halda gözləyirik. Mən axşam saatlarında da Yaqubluya yenə baş çəkəcəyəm. Həkimlərlə mürəmadi əlaqə saxlayırram. Səhhəti nəzarət altındadır", deyə Adil Qeybulla bildirib.

Hazırda Tofiq Yaqublu və Bəxtiyar Hacıyev daxil olmaqla, 15 siyasi fəal "Tofiq Yaqubluya, Bəxtiyar Hacıyevə və bütün siyasi məhbuslara azadlıq" tələbi ilə aclıq aksiyası keçirir.

Müsavat Partiyasının qərargahında aclıq edən Babək Həsənov deyib ki, bu gün iki fəal aclığı dayandırıb, daha bir fəal aclığa başlayıb.

"Aclıq edənlərin səhhətində dəyişklik olsa da, ciddi fəsadlar hələ yaranmayıb", deyə o qeyd edib.

* DQMŞ-nin və Müsavat Partiyasının üzvü Tofiq Yaqublu dekabrın 23-də Bakının mərkəzində insan hüquqları fəalı Bəxtiyar Hacıyevin azadlığa buraxılması tələbi ilə keçirilən etiraz aksiyasında saxlanıb.

Həmin gün Səbail Rayon Məhkəməsi onu İnizbati Xətalar Məcəlləsinin 535.1 (polisin qanuni tələbinə tabe olmamaq) və 510-cu (xırda xuliqanlıq) maddələri ilə təqsirli bilərək 30 sutka inzibati həbsə məhkum edib.

Yanvarın 5-də Bakı Apellyasiya Məhkəməsi Tofiq Yaqublunun həbsindən verilən apellyasiya şikayətini təmin etməyib. O, məhkəmə qərarına etiraz olaraq aclıq elan etbiyini bildirib.

Aclığın yeddinci günündə Yaqublu Bakı şəhər 6 saylı xəstəxanasına köçürülüb. 06B