Bakı/03.03.20/Turan: Martın 3-də hakim Əziz Seyidovun sədrliyi ilə Azərbaycan Ali Məhkəməsi Azərbaycan Xalq Cəbhəsi Partiyasının fəalı, həbsdə olan Fuad Əhmədlinin vaxtından əvvəl şərti azadlığa buraxılmasından imtina ilə bağlı kassasiya şikayətini təmin etməyib. F.Əhmədlinin özü məhkəmədə iştirakdan imtina edib.
Hakim Ə. Seyidov bu günki qərarını məhkəməyə təqdim edilən sənədlərdə F.Əhmədlinin cəzaçəkmə müəssisəsində rejim qaydalarına əməl etməməsinin əksini tapması ilə əsaslandırıb.
Vəkil Zibeydə Sadıqova F.Əhmədlinin siyasi baxışlarına görə həbs edildiyini bildirib.
“O, Amnesty İnternational tərəfindən vicdan məhbusu, yerli hüquq müdafiəçiləri tərəfindən siyasi məhbus kimi tanınıb. Əhmədlinin saxlanıldığı cəzaşəkmə müəssisəsində bütün siyasi məhbuslara qarşı münasibət eynidir”,- vəkil qeyd edib.
Vəkil çıxışında Azərbaycan prezidentinin “məhkəmələrin qərarları insanları həbsdən azad etməyə meylli olmalıdır” ifadələrinə istinad etsə də məhkəmənin qərarına təsiri olmayıb.
F. Əhmədlinin atası Zəfər Əhmədli hesab edir ki, oğlunun həbsdən azad edilməsi ilə bağlı hələ yuxarıdan qərar verilməyib. “Bu səbəbdən də məhkəmə onu həbsdən azad edə bilməz. Fuad Əhmədlinin barəsində cəzaçəkmə müəssisəsinin təqdim etdiyi xasiyyətnamə reallığı əks etdirmir. Fuad cəzaçəkmə müəssisəsində ingilis dilində olan kitabı tərcümə edib, ingilis dili kursları açıb, çoxsaylı məhbusa ingilis dili öyrədib. O, rejim qaydalarını pozmayıb, bir qayda olaraq haqqını tələb edib”, - o deyib.
Xatırladaq ki, F.Əhmədli 2016-cı ilin avqustunda “Əməliyyat- axtarış fəaliyyəti haqqında qanun”un pozulması və “Azerfon” mobil telefon istifadəçilərinin şəxsi məlumatlarının yayılması ittihamı ilə həbs edilib. Bundan əlavə, o, vəzifə səlahiyyətini aşmaqda ittiham olunub.
2017-ci il iyunun 16-da 4 il azadlıqdan məhrum edilib. Sonradan Apellyasiya Məhkəməsi və Ali Məhkəmə hökmü qüvvədə saxlayıblar. Hüquq müdafiəçiləri F.Əhmədlini siyasi məhbus kimi tanıyıblar.
Bu ilin mayında Suraxanı Rayon Məhkəməsi F.Əhmədlinin cəzasının yarıdan çoxunu çəkməsilə əlaqədar şərti olaraq vaxtından əvvəl azadlığa buraxılması barədə müraciətini təmin etməyib. Yuxarı instansiya məhkəmələr bu qərarı qüvvədə saxlayıblar. Fəalın cəzasının bitməsinə 10 ay qalır.-03B06-
Cəmiyyət
-
Bazar günü, oktyabrın 6-da Bakıda və Abşeron yarımadasında hava şəraitinin dəyişkən buludlu, əsasən yağmursuz olacağı gözlənilir, mülayim cənub-şərq küləyi əsəcək.
-
Naxçıvanda 1 saylı tam orta məktəbin müəlliməsi Səriyyə Qənbərova işdən çıxarılıb. Naxçıvan MR Təhsil Nazirliyindən bildirilib ki, o, məktəbdə sinif rəhbəri vəzifəsi və həftəlik 26 saat dərs yükü ilə təmin edilmişdi. "2024-cü ilin sentyabr ayı ərzində əmək intizamını pozaraq işə çıxmayıb, tədris başlandıqdan sonra üzrlü səbəb olmadan cədvəl üzrə dərslərini tədris etməyib. Həmçinin Səriyyə Qənbərova müxtəlif sosial şəbəkələrdə və saytlarda paylaşdığı məlumatlarla, eyni zamanda müəssisədə insident yaratmaqla "Təhsilverənlərin etik davranış Qaydaları"nı kobud surətdə pozub".
-
Son zamanlar bəzi dövlətlər dünyanı nüvə silahı ilə təhdid etməkdədir. 2022-ci ildə Ukraynaya açıq təcavüz edən Rusiya rəsmiləri də son aylar Qərb ölkələrini Ukraynaya verdikləri silahlarından onların ərazilərini vurmağa icazə verəcəkləri təqdirdə açıqca nüvə silahından istifadə edə biləcəkləri ilə hədələyirlər.
-
Oktyabrın 5-də paytaxtda hava dəyişkən olacaq, yağıntı olmayacaq. Şimal-şərq küləyi şimal-qərb küləyinə keçəcək.
Rəy yaz