Almaniyadan deportasiya edilmiş fəal 6,5 il müddətinə azadlıqdan məhrum edilib

Bakı/12/18/23/Turan: Dekabrın 18-də Bakı Ağır Cinayətlər Məhkəməsində Almaniyadan deportasiya olunduqdan sonra həbs edilən fəal Samir Aşurova hökm oxunub.

Məhkəmə onu CM-nin 126.2.4-cü (xuliqanlıq məqsədilə qəsdən sağlamlığa ağır zərər vurma) və 221.3-cü (silahdan və ya silah qismində istifadə edilən əşyadan istifadə etməklə xuliqanlıq) maddələri ilə təqsirli bilib.

.Məhkəmənin hökmü ilə Aşurov 6,5 il müddətinə azadlıqdan məhrum edilib.

Aşurov son sözündə onun ittiham olunduğu cinayətləri törətmədiyini bildirib. O qeyd edib ki, müxalid  fəaliyyətinə görə ona qarşı təxribat törədilib.

“Azərbaycanda iki dəfə inzibati həbsə məruz qaldıqdan sonra 2018-ci ildə Almaniyaya mühacirət etdim. Məni üçüncü dəfə uzun müddət həbs edəcəkləri ilə hədələdilər. Mən getdim və orada Azərbaycanda insan haqları uğrunda mübarizəmi davam etdirdim. 29 mart 2022-ci ildə məni deportasiya  etdilər. Bakıda məni prokurorluğa çağırıb hədələdilər. O vaxt  məni narkotik ittihamı ilə həbs oluna biləcəyim barədə açıqlama verdim. Çünki məndən əvvəl Almaniyadan deportasiya edilmiş 4 fəalı bu saxta ittihamla həbs etmişdilər. Görünür, bundan sonra “ssenari”ni dəyişdilər və mən başqa ittihamlarla həbs olundum”, - Aşurov bildirib.

Vəkil Elçin Sadıqov bildirib ki, məhkəmə istintaqı Aşurovun təqsirini sübuta yetirməyib. Müdafiə tərəfi hökmdən apellyasiya şikayəti verəcək.

* Samir Aşurov bu il martın 29-da Almaniyadan qovulub, 20 gün sonra isə Bakıda polis tərəfindən saxlanılıb. O, Elşən Nəbiyevi bıçaqlamaqda ittiham olunurdu.

Hüquq müdafiəçiləri Aşurovu “siyasi məhbus” kimi tanıyıblar, təqibin əsl səbəbinin insan haqlarının pozulmasına qarşı etiraz aksiyalarında iştirak olduğunu hesab ediblər.-30В03-