Açiq mənbələrdən foto.
Apellyasiya Məhkəməsi Müsavat Partiyasının üzvünün inzibati həbsindən şikayəti təmin etməyib
Bakı/06.08.22/Turan: Avqustun 5-də Bakı Apellyasiya Məhkəməsi Müsavat Partiyası sədrinin müşaviri Əlikram Xurşidovun barəsində 30 sutka inzibati həbs qərarından şikayəti təmin etməyib. Bu barədə Turan-a onun vəkili Nemət Kərimli bildirib.
Məhkəmə prosesi zamanı Xurşidov ona qarşı işin saxtalaşdırıldığını, “polisə tabe olmamaq” ittihamının saxta olduğunu bildirib.
O deyib ki, iyulun 26-da günorta metronun “İçərişəhər” stansiyasında saxlanılıb. Lakin iş materialında yazılıb ki, guya Badamdar qəsəbəsində kiminləsə “telefonla yüksək səslə nalayiq sözlər danışarkən” saxlanılıb və polis onu “söyüş söyməməyə” çağıran zaman “polisin tələbinə tabe olmayıb”.
Vəkil Kərimli inzibati iş materiallarında uyğunsuzluqları qeyd edib.
“Xurşidov ifadəsində bildirib ki, iyulun 26-da saat 11.15-də metronun “İçərişəhər” stansiyasından çıxarkən saxlanılıb. Lakin sahə polis müvəkkili öz ifadəsində qeyd edib ki, Xurşidov göstərilən vaxtda, lakin Badamdar qəsəbəsində saxlanılıb. “İçərişəhər” metrostansiyası ilə Badamdar qəsəbəsi arasında məsafə kifayət qədər böyükdür və Xurşidov metrodan çıxdıqdan dərhal sonra Badamdara gedə bilməz”, - vəkil deyib.
Müdafiə tərəfi vəsatət qaldırıb ki, iyulun 26-da saat 10.45-dən 11.25-dək “İçərişəhər” stansiyasının giriş-çıxışında Bakı metropoliteninin müşahidə kameralarından qeydlər tələb olunsun. Vəkil deyib ki, bu, Xurşidovun metrodan çıxma vaxtı ilə bağlı dediklərini təsdiqləyəcək, eyni zamanda ittihamın əsassızlığını sübut edəcək.
Lakin apellyasiya instansiyası vəsatəti təmin etməyib və birinci instansiya məhkəməsinin “qanunsuz qərarını” qüvvədə saxlayıb”, - Kərimli vurğulayıb.
Onun sözlərinə görə, bu qərardan Avropa İnsan Hüquqları Məhkəməsinə şikayət veriləcək.
* Əlikram Xurşidov iyulun 26-da "polisə tabe olmamaq” inzibati işi üzrə 30 sutkalığa həbs edilib. Müsavat Partiyasında ittihamı uydurma adlandırıblar və bildiriblər ki, həbsin əsl səbəbi 20 iyulda ölkənin quru yollarının açılması tələbilə etiraz aksiyasında saxlanıldıqdan sonra polisin kobud və qeyri-etik hərəkətlərini üzə çıxarmasıdır. Daxili İşlər Nazirliyi bu iddiaları rədd edərək, Xurşidovun inzibati hüquqpozmaya görə məsuliyyətə cəlb olunduğunu bildirib.—06B-
Cəmiyyət
-
İstanbul Hava Limanında həyata keçirilən bir əməliyyat, diplomatik münasibətlərdə sarsıntı yarada biləcək bir hadisəni üzə çıxardı. Azərbaycan hərbi attaşesi olduğu iddia edilən Kəhrəman Şamil oğlu Məmmədov, 70 kiloqram qızıl ilə saxlanıldı. Türkiyə KİV-in məlumatına görə, Məmmədovun diplomat olması ilə bağlı açıqlamalarına baxmayaraq, hadisənin qızıl qaçaqmalçılığı ilə bağlı olduğu güman edilir.
-
Sərin bir noyabr axşamı, Bakının sakinləri Xəzər dənizinin sahilində toplaşaraq, sahilə vurulmuş nəhəng bir balinanın bədənini heyrətlə izlədilər. 16 metr uzunluğunda olan bu məxluqun cansız görünən forması və kəskin qoxusu bir çoxlarına ekoloji faciənin şahidi olduqlarını düşündürdü. Lakin bu gecə sirli qonaq artıq yox idi – yük platformasına yüklənərək hava limanına aparılmışdı.
-
Noyabrın 25-dən etibarən COP29 konfransı iştirakçılarına ayrılmış xüsusi avtomobil zolaqları öz eksklüziv statusunu itirəcək və bütün nəqliyyat vasitələri üçün açıq olacaq. Bu barədə Yerüstü Nəqliyyat Agentliyi (AYNA) məlumat yayıb.
-
Noyabrın 24-də Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağıntısız keçəcəyi gözlənilir. Lakin gecə və səhər bəzi yerlərdə duman, çiskin olacağı, gündüz isə qısamüddətli yağış yağacağı ehtimalı var. Mülayim cənub-şərq küləyi axşam şimal-qərb küləyi ilə əvəz olunacaq.
Rəy yaz