Avropadan Azərbaycana və əks istiqamətə gizli yolla valyuta köçürən dəstə ifşa edilib

Bakı/13.09.23/Turan: Azərbaycan Dövlət Təhlükəsizliyi Xidmətinin (DTX) Avropadan Azərbaycana və əks istiqamətdə xüsusilə külli miqdarda valyutanın köçürülməsi üzrə gizli sistem təşkil edən dəstəni ifşa etdiyi bildirilir.

İfşa olunan şəxslərdən biri Azərbaycan vətəndaşı Pərviz İsmayılovdur.

Səbail Rayon Məhkəməsindən Turan agentliyinə bildiriblər ki, Dövlət Təhlükəsizliyi Xidmətinin İstintaq orqanı tərəfindən verilən vəsatət əsasında Pərviz İsmayılov barəsində Cinayət Məcəlləsinin 206-1.3-cü (xüsusilə külli miqdarda xaricdən və xaricə qanunsuz pul köçürmələri) maddəsi ilə sentyabrın 8-də 4 ay həbs qətimkan tədbiri seçilib.

Yerli hüquq-mühafizə orqanlarındakı mənbələr bildirib ki, ittihama əsasən, Pərviz İsmayılov xarici ölkə vətəndaşları ilə qabaqcadan əlbir olan bir qrup şəxs halında qəsdən əvəzləşdirmə və digər qarşılıqlı hesablaşma üsulları ilə müxtəlif valyutalarda xüsusilə külli miqdarda pul vəsaitlərinin qanunsuz olaraq xarici ölkədən Azərbaycana və Azərbaycandan xarici ölkəyə köçürülməsi fəaliyyəti ilə məşğul olmaqda təqsirləndirilir.

"Milyonlarla dövriyyəsi olan qeyd olunan kölgə iqtisadiyyat şəbəkəsi vasitəsilə dövlət qeydiyyatından kənar Azərbaycana keçirilmiş həmin pul vəsaitlərinin çatdırıldığı şəxslər sırasında dövlət təhlükəsizliyinə qarşı müxtəlif cinayətlərə görə məsuliyyətə cəlb edilmiş şəxslər, habelə müxtəlif radikal ekstremist yönümlü qruplar da olub", deyə qeyd edilir.

Pərviz İsmayılovun yaxınları və müdafiəçiləri bu ittihamla bağlı hələ münasibət bildirməyib. 03