Azərbaycan prezidentinin Novruz təbriki

Prezident İlham Əliyev Novruz bayramı münasibətilə Azərbaycan xalqını təbrik edib.

Təbrikdə deyilir ki, Novruz ənənələri Azərbaycanın dəyərlər sistemində müstəsna yer tutur, xalqın təfəkkürünün ayrılmaz tərkib hissəsinə çevrilib. “Cəmiyyət üzvləri arasında qarşılıqlı ünsiyyətə çağırması, səmimiyyəti gücləndirməsi və yüksək əxlaqi keyfiyyətlər formalaşdırması onu ən ali insani xüsusiyyətlərin daşıyıcısı kimi ümumbəşəri mədəni sərvətlər sırasına daxil edir”.

Dövlət başçısı xatırladır ki, bahar bayramı keçmişin ən çətin dövrlərində belə zehinlərdən silinməyib, gələcəyə inamı sarsılmağa qoymayıb. “Qəlbimizin dərinliklərində kök salaraq milli özünüdərk məfkurəsini yaşatması sayəsində o, ötən əsrin sonlarına doğru Azərbaycanda müstəqil dövlətçilik ideallarının gerçəkləşməsini təmin edən mühüm amillərdəndir. Mənəvi mədəniyyətimizin zənginliklərini özündə toplamış qədim Novruz mərasimlərini qloballaşmanın vüsət aldığı, sürətlə dəyişən dünyada bütün rəngarəngliyi ilə layiqincə qoruyub saxlaması müasir Azərbaycanın tarixi-mədəni və milli-mənəvi irsə bağlılığının rəmzidir”.

Prezident bildirir ki, Azərbaycanla birgə baharı azərbaycançılıq düşüncəsi işığında minlərlə soydaş ölkənin hüdudlarından uzaqlarda qarşılayır. “Həmrəyliyimizin rəmzi olaraq bu ümumxalq bayramı qoy hər bir ailəyə bol sevinc və ruzi-bərəkət bəxş eləsin”, deyə təbrikdə qeyd edilir. -03D-