Azərbaycan-Qazaxıstan Ekspert Şurasını yaradılır

Bakı/24.05.22/Turan: Bakıda Azərbaycan və Qazaxıstan arasında diplomatik münasibətlərin qurulmasının 30 illiyinə həsr olunmuş “dəyirmi masa” zamanı Azərbaycan-Qazaxıstan Ekspert Şurasının yaradılması haqda memorandum imzalanıb, “Kazinform”  Beynəlxalq İnformasiya Agentliyinin xüsusi müxbiri bildirib.

Sənədi iki ölkə adından Beynəlxalq Münasibətlərin Təhlili Mərkəzinin  İdarə Heyətinin sədri Fərid Şəfiyev və Qazaxıstan Respublikası prezidenti yanında Strateji Araşdırmalar İnstitutunun direktoru Erkin Tukumov imzalayıblar.

Tərəflər qeyd ediblər ki, son geosiyasi çağırışlar təkcə iki ölkə arasında deyil, bütövlükdə region dövlətləri arasında düzgün qiymətləndirmə tələb edir. Şuranın yaradılması bu ölkələrin regionda baş verən hadisələrə vaxtında reaksiya verməsinə, onların düzgün qiymətləndirilməsinə xidmət edəcək. Memorandumun imzalanmasından sonra iki ölkənin beyin mərkəzlərinin işinin fəallaşması, məruzələr, analitik hesablamalar  kimi birgə intellektual məhsulların hazırlanması gözlənilir.

Tədbirdə Azərbaycan parlamentinin Qazaxıstanla parlamentlərarası əlaqələr qrupunda olan deputatları, Qazaxıstan Respublikasının Bakıdakı səfirliyinin diplomatları, Azərbaycanın aparıcı ali məktəblərinin rəhbərləri, Heydər Əliyev adına Azərbaycan-Qazaxıstan Dostluq Cəmiyyətinin və ekspert cameəsinin nümayəndələri iştirak ediblər.

Tukumov qeyd edib ki, Şuranın yaradılması tarixi prosesdir və formal xarakter daşımayacaq. "Ən yaxın vaxtlarda biz Ekspert Şurasının üzvlərini bir-biri ilə tanış etmək və gələcək birgə fəaliyyətimizlə bağlı fikir mübadiləsi aparmaq üçün ilk təşkilati görüşü keçirəcəyik. Başlamaq üçün sonradan layihələrin konkretləşdirilməsilə ideyaların virtual bankını yaratmaq mümkün olardı", - spiker qeyd edib.

Azərbaycan Beynəlxalq Münasibətlərin Təhlili Mərkəzinin  İdarə Heyətinin sədri Fərid Şəfiyev qeyd edib ki, bu gün hər iki ölkədə və regionda çox ciddi hadisələr baş verir. Bəzən mətbuatın reaksiyası regionda baş verənləri tam düzgün əks etdirmir.

O, bununla bağlı qeyd edib ki, Şura cari çağırışların və reallıqların düzgün qiymətləndirilməsinə xidmət edəcək, onun çərçivəsində humanitar, siyasi və iqtisadi sahələrə aid məsələlər müzakirə olunacaq.—0—