Azərbaycan Talışları İctimai Şurası Qubad İbadoğlunu azad etməyə çağırıb

Bakı/25.07.23/Turan: Azərbaycan Talışları İctimai Şurası Azərbaycan Demokratiya və Rifah Partiyasının sədri Qubad İbadoğlunun həbsi ilə bağlı bəyanat yayıb. Bəyanatda deyilir: 

"Təəssüf hissi ilə bildiririk ki, azad fikirli vətəndaşların saxta ittihamlarla həbs kampaniyası son vaxtlarda Azərbaycan Respublikasında daha sərt formada həyata keçirilir. Dünyada tanınmış iqtisadçı alim və ictimai-siyasi xadim professor Qubad İbadoğlu dünən - 23.07.2023-cü il tarixində ağlasığmaz saxta ittihamlarla Bakı şəhərində həbs edilmiş və xanımı ilə birgə amansız işgəncələrə məruz qalmışdır.

Azərbaycan Demokratiya və Rifah Partiyasının (ADRP) sədri Qubad İbadoğlu ölkəmizdə vətəndaş cəmiyyəti və hüquqi dövlət quruculuğunu hədəfləyən, barmaqla sayıla biləcək siyasi xadimlərdən biridir. Biz ATİŞ olaraq onun intellektinə, siyasi təfəkkürünə, əqidəsinə, dünyagörüşünə, bilik-bacarığına, mədəniyyətinə, ölkəmizin etnik müxtəlifliyinə olan dözümlülüyünə, tolerantlığına və demokratik idarəetmə prinsiplərinə sadiqliyinə inanır, etibar edirik.    

Professor Qubad İbadoğlu yüksək elmi, mədəni, tolerant, demokratik ictimai-siyasi əqidəsi və dünyagörüşü ilə fərqlənən ziyalılardan biri olmaqla, Azərbaycanda yaşayan digər xalqlar kimi, talışların da milli-mədəni tərəqqisinə daim müsbət münasibət bəsləmişdir. Sadaladığımız səmimi, sivil, demokratik və multikultural dəyərlərə malik olması və bir qüdrətli siyasətçi, partiya sədri kimi Qubad İbadoğlunun bu istiqamətdəki fəaliyyəti, görünür özündən bədgüman olan hakimiyyət dairələrini ciddi narahat etmişdir.

Azərbaycan Talışları İctimai Şurası (ATİŞ) hesab edir ki, ölkəmizdə demokratik islahatların tezliklə baş tutması və icrası mövcud hakimiyyətin ən yuxarı eşalon nümayəndələrindən tutmuş, adi sıravi vətəndaşlara qədər hər kəsə xeyirlidir. Ona görə də ATİŞ professor Qubad İbadoğlunun saxta ittihamlarla həbsini, onun müxalif ictimai-siyasi mövgeyi ilə bağlı olduğunu hesab edir və dərhal azad edilməsini tələb edir". 0