Azərbaycana kokain gətirənlər həbs edilib

Bakı/19.05.23/Turan: Cənubi Amerikadan tranzit yolu ilə Avropaya narkotik maddə - ekstazi və kokain daşıyan bir qrup şəxs Azərbaycanda həbs edilib.

Daxili İşlər Nazirliyinin mətbuat xidməti bildirib ki, Baş Narkotiklərlə Mübarizə İdarəsinin əməkdaşlarının əməliyyatı zamanı Xalid İsgəndərov, Xəyyam Əsədov və Elman Yusifov saxlanılıb. Onlardan təxminən 1 kiloqram kokain və 3284 ədəd ekstazi həbi götürülüb.

Narkotik maddələr Cənubi Amerikadan tranzitlə Avropaya daşınırmış.

Yük maşınının sürücüsü Yusifov beynəlxalq yükdaşımalarla məşğul olub və Azərbaycana narkotik maddələr gətirib.

Əsədovun işi narkotik maddələri sərhədyanı zonalardan götürərək İsgəndərova çatdırmaq olub. Sonuncu isə kokain və ekstazinin Bakıda satışı və əldə olunan vəsaitin ölkədən çıxarılması ilə məşğul olub.

Yardımlı rayonunda digər əməliyyat zamanı polis daha 5 nəfəri saxlayıb. Onlardan 50 kiloqram narkotik maddə aşkarlanıb: 33 kiloqram heroin, 12 kiloqram marixuana, 5 kiloqram metamfetamin və 210 psixotrop həb.

Saxlanılan şəxslər narkokuryer olduqlarını və şərti adları Kazım, Fəridin, Babək olan iranlılarla işlədiklərini deyiblər.

Hər iki fakt üzrə Cinayət Məcəlləsinin müvafiq maddələrilə cinayət işlərinə başlanılıb. Saxlanılan şəxslər həbs edilib. 06B0