Azərbaycanda 2022-ci ilin 8 ayı ərzində 4,5 ton narkotik vasitə qanunsuz dövriyyədən çıxarılıb

Bakı/16.09.22/Turan: Narkomanlığa və narkotik vasitələrin qanunsuz dövriyyəsinə qarşı mübarizə üzrə Dövlət Komissiyası 2022-ci ilin yanvar-avqust aylarının yekununa dair məlumatları açıqlayıb.

Məlumata görə, cari ilin 8 ayı ərzində 7440 cinayət faktı aşkarlanıb. Onlardan 2604-ü narkotik vasitələrin qanunsuz satışı, 4412-si bu vasitələrin qanunsuz əldə edilib saxlanılması, 352-si qanunsuz olaraq narkotik xassəli bitkilərin kultivasiya edilməsi və s. ilə bağlıdır.

Aşkarlanmış faktlar üzrə qanunsuz dövriyyədən ümumilikdə müsadirə olunmuş 4 ton 410 kq və 32762 həb narkotik vasitələrin və psixotrop maddələrin 1 ton 886 kq-nı heroin, 1 ton 474 kq-nı marixuana, 251 kq-nı tiryək, 27 kq-nı həşiş, 260,95 qr-nı kokain, 32238 həb metadon, 129 kq 282,257 qr-nı digər narkotik vasitələr təşkil edib.

Narkotiklərin qanunsuz dövriyyəsi ilə bağlı cinayət məsuliyyətinə 5412 nəfər cəlb edilib. Cinayət məsuliyyətinə cəlb edilmiş şəxslərdən 60 nəfəri xarici ölkə vətəndaşıdır.

Məsuliyyətə cəlb edilmiş 60 xarici ölkə vətəndaşından 27-si İran, 13-ü Rusiya, 8-i Türkiyə, 7-si Gürcüstan, 1-i Türkmənistan,1-i Qazaxıstan, 1-i Pakistan, 1-i Ukrayna, və 1-i Maldiv vətəndaşı olub.

Xarici ölkə vətəndaşlarından ümumilikdə 986 kq və 4178 həb müxtəlif növ narkotik vasitə və psixotrop maddələr və s. götürülüb.

Narkotik vasitələrin və psixotrop maddələrin qaçaqmalçılıq yolu ilə ölkə ərazisinə gətirilməsi ilə bağlı 182 fakt aşkar edilib və həmin faktlar üzrə qanunsuz dövriyyədən 2 ton 006 kq maddə çıxarılıb.

Qanunsuz dövriyyədən götürülmüş 4 ton 410 kq 440,04 qr narkotik vasitə və psixotrop maddələrin dəyəri 154 milyon 775 000 AZN (91 milyon ABŞ dolları) kimi qiymətləndirilir. 05D