Azərbaycanda Facebook istifadəçiləri problemlə üzləşirlər

Bakı/22.05.20/Turan: Azərbaycanda sosial şəbəkələrin iştirakçıları mayın 21-dən başlayaraq Facebook səhifələrində problemlər qeydə alırlar. Bu informasiya mübadiləsinin ləngiməsində və ya səhifələrin tam bloklanmasında özünü  göstərir.

Belə ki, Turan agentliyinin səhifəsi bir saatdan çox bloklanıb, onun veb-səhifəsi isə mayın 15-dən başlayaraq üç gün ərzində DDoS hücuma məruz qalıb.

“Biz məlumatları Facebook səhifəsində yerləşdirə bilmədik, səhifə bizim operatorun manipulyasiyasına reaksiya vermədi”, - Turan-ın direktoru Mehman Əliyev bildirib.

Problemlər barədə bloger Natiq Əbilov, Ülvi Həsənli, Fikrət Fərəməzoğlu və başqaları da məlumat veriblər.

Ülvi Həsənli yazır ki, populyar səhifələrdə məlumatı yerləşdirmək və ya sadəcə oxumaq çətindir.

Son vaxtlar hakimiyyət robo-trollingdən istifadə etməyə başlayıb. O, saytlara və Facebook səhifələrinə hücum edir, onlara hökumətyönlü difiramblar yerləşdirir və hakimiyyət tənqidçilərinin ünvanına  lənətlər yağdırır.

Rabitə və Yüksək Texnologiyalar Nazirliyi (RYTN) isə elektron xidmətlərin inkişafı üzrə tənzimləyici və koordinator kimi elə davranır ki, sanki heç bir şey baş vermir.

Araşdırmaçı jurnalist Xədicə İsmayılova yazır ki, bu nazirlik “Azadlıq” radiosunun xəbər səhifələrinin, “Meydan” TV, Turan TV və “Azadlıq” qəzetinin Facebook səhifəsinin və VPN vasitəsilə bloklanması üçün məhkəmədən sanksiya istəyib.

Son zamanlar Azərbaycanın İnternet şəbəkəsində baş verənlər göstərir ki, hakimiyyət söz və informasiya azadlığına məhdudiyyətlərin azaldılmasını istəmir. Azərbaycanda vəziyyətin pisləşməsini qeydə alan “Sərhədsiz Reportyorlar”ın bu yaxınlardakı hesabatı da bundan xəbər verir. Hesabatda Azərbaycanda söz azadlığının reytinqi dünya üzrə 166-dan 168-ə enib.—0—