Azərbaycanda vaksinasiya dövlət tərəfindən maliyyələşdiriləcək

Bakı/05.01.20/Turan:  Azərbaycanda koronavirusa qarşı vaksinasiya dövlət hesabına və könüllülük əsasında həyata keçiriləcək. Bu barədə jurnalistlərə Səhiyyə Nazirliyinin baş infeksionisti Təyyar Eyvazov bildirib.

Kütləviliyin təmin edilməsi üçün əhali arasında peyvəndin vacibliyinə dair maarifləndirmə işinin aparılması nəzərdə tutulur. "Adamları başa salmaq lazımdır peyvənddən imtina koronavirusa yoluxma riskini yaradır. Peyvənddə məqsəd adamlarda kollektiv immunitet yaratmaqdır", - o qeyd edib.

Epidemiologiya qanunlarına görə, kollektiv immunitet əhalinin 2/3-də formalaşırsa, epidemiya prosesi dayandırılacaq. İmmunitetin süni, yoxsa təbii yolla yaradılması vacib deyil, Səhiyyə Nazirliyinin nümayəndəsi deyib.

Bir sıra ölkələrdə peyvəndə ilkin olaraq əhalinin risk qrupuna aid hissəsi - tibb işçiləri, xroniki tənəffüs sistemi xəstəlikləri olan adamlar, 65 yaşdan yuxarı şəxslər və digərləri cəlb edilir.  Klinik sınaqlar göstərib ki, həmin ölkələrdə tətbiq edilən peyvəndlərin effektivliyi 95-98%- ə çatır.

Baş infeksionist vurğulayıb ki, əhalinin müxtəlif qrupları üçün peyvəndin effektivlik  göstəriciləri kütləvi vaksinasiyanın nəticələrinə əsasən dəqiqləşdiriləcək. – 06B-