Azərbaycanlı ingilis dili müəllimləri ABŞ-ın dəstəyilə təşkil olunmuş konfransa toplaşırlar

2024-cü il iyunun 28-də Azərbaycanın orta məktəblərinin 400-dən çox ingilis dili müəllimi ADA Universitetində ikigünlük seminar və konfransda toplaşacaq. Tədbir ABŞ səfirliyi, ADA Universiteti və Şimali Karolina Universitetinin dəstəyilə keçirilir. Dördüncü ildir ki, Şimali Karolina Universitetinin yardımı ilə keçirilən  və ABŞ Dövlət Departamenti tərəfindən maliyyələşdirilən tədbir ingilis dili magistr sertifikatı almaq üçün intensiv 18 həftəlik onlayn- proqramın kulminasiya nöqtəsidir.

ABŞ səfirliyinin missiya rəhbərinin müavini Hüqo Gevara giriş sözü ilə çıxış edərək bütün Azərbaycan üzrə ingilis dilinin tədrisi imkanlarının genişləndirilməsi üçün proqramın əhəmiyyətini vurğulayacaq. Konfransda Azərbaycanın müxtəlif bölgələrindən, o cümlədən Bakı, Gəncə, Naxçıvan və Mingəçevirdən müəllimlər iştirak edəcəklər. Konfransda məqsəd pedaqoji ustalığı artırmaq və etibarlı həmyaşıd müəllimlər şəbəkəsi yaratmaqdır.

2020-ci ildə virtual tədris proqramı işə salındığı andan 350 azərbaycanlı müəllim magistratura səviyyəsində qabaqcıl tədris metodikasına yiyələnib. Proqramın davamlı müvəffəqiyyəti ölkə boyunca ingilis dilinin inkişaf etdirilməsində onun rolunu önə çəkir.

ABŞ səfirliyi və Şimali Karolina Dövlət Universiteti yaxın illərdə Azərbaycan Elm və Təhsil Nazirliyi və Təhsil İnstitutu ilə bu əməkdaşlığı davam etdirməyi planlaşdırır. Bu tərəfdaşlıq Azərbaycanda ingilis dilində təhsili əhəmiyyətli dərəcədə gücləndirib, iki ölkə arasında sıx əlaqələri daha da möhkəmləndirib və Azərbaycanın daha geniş təhsil hədəflərini dəstəkləyib.

Proqramın bir neçə məzunu beynəlxalq konfranslarda və mübadilə proqramlarında tanınıb ki, bu da təşəbbüsün Azərbaycanın təhsil cəmiyyətində peşəkar inkişafa və beynəlxalq əməkdaşlığa təsirini bir daha önə çəkir.