Azərbaycanlı “Vımpelkom”a prezident seçilib

Bakı/19.08.20/Turan: “Vımpelkom”un Direktorlar Şurası avqustun 17-də RF rabitə nazirinin keçmiş müavini Rəşid İsmayılovu şirkətin prezidenti seçib. Bu barədə Rusiyanın bu qabaqcıl telekommunikasiya şirkətinin məlumatında deyilir. “Vımpelkom” 2009-cu ildən etibarən dünyada 240 milyondan çox abunəyə xidmət göstərən beynəlxalq “Veon Ltd.” Qrupuna daxildir.

Rəşid İsmayılov 1965-ci il noyabrın 2-də Bakıda dünyaya gəlib. Moskvada SSRİ XİN-in internat məktəbini bitirib.

İki ali təhsili var. 1988-ci ildə o, Lomonosov adına MDU-nu bitirib. 1998-2005-ci illərdə Ericsson, Rusiya şirkətində inşaat və rabitə şəbəkələrinin inkişafı üzrə direktordan 12 ölkəni birləşdirən “Rusiya-MDB” regionuna texniki dəstək xidmətinin direktoruna qədər müxtəlif vəzifələri tutub.

2005-2010-cu illərdə Nokia Siemens Networks Russia şirkətində işləyib, “Rusiya” regionunda servis idarəsinə rəhbərlik edib.

2010-2013-cü illərdə Huawei Technologies şirkətində servis, satınalmalar və tədarük üzrə vitse-prezident vəzifəsində işləyib.

2013-cü ildən etibarən Kommunikasiya və Rabitə Nazirliyinin beynəlxalq əməkdaşlıq departamentinin direktoru olub.

2014-cü il avqustun 7-də Rəşid İsmayılov RF rabitə nazirinin müavini təyin edilib.

2018-ci ildə o, Rusiyada Nokia-nın baş direktoru olub, 2020-ci ildən isə “Vımpelkom” prezidentinin müşaviri vəsifəsinə keçib. -02D-