Bakı yollarını texnika təmizləyəcək, hakimiyyətin vədi belədir

Bakı/21.08.18/Turan: Rusiyanın "Yaroslaviç" istehsal şirkəti Azərbaycana beş ədəd KDM76-15 "Yaroslaviç" kommunal-yol maşınından ibarət partiya göndərib. Bu barədə yerli saytlar məlumat yayıb.

Bu nəqliyyat vasitələri sərt örtüklü yollara xidmət üçün nəzərdə tutulub və mövsümi məhdudiyyətləri yoxdur. Onlar şəhər yollarında və şəhərətrafı yollarda istismar üçün uyğundur.

Texniki xüsusiyyətlərinə əsasən, qış vaxtı KDM76-15-dən yolun yeni yağan qardan təmizlənməsi, qar yığının təmizlənməsi, buzlanma əleyhinə dənəvər materialın, o cümlədən duzun və maye reagentlərin səpilməsi üçün istifadə olunur. Yay vaxtı yolların, hasarların haşiyələrin, yol nişanlarının və yol inşaatı elementlərinin təmizlənməsi və yuyulması, habelə çuxurların təmiri zamanı asfalt daşınması üçün istifadə olunur.

Azərbaycana KDM76-15 kommunal-yol maşınlarının ixracı müqaviləsi 2018-ci ilin yazında imzalanıb və 9 ədəd bu texnikadan göndərilməsini nəzərdə tutur.

Bu çoxdan gözlənilən və sevindirici hadisədən əvvəl Bakı yollarında təmizliklə bağlı bir sıra faciəvi hadisə baş verib. Bu ilin fevralından avqustuna qədər paytaxtın müxtəlif hərəkətli yollarında 7 süpürgəçi qadın həlak olub. Fevralın 26-da səhər saatlarında standart təhlükəsizlik tədbirlərinin təmin edilməsinə baxmayaraq, yolun hərəkət hissəsini süpürən 49 yaşlı Nərgiz Əsgərova yol-nəqliyyat hadisəsinin (YNH) qurbanı olub. Aldığı xəsarətlərdən qadın hadisə yerindəcə keçinib. Yeri gəlmişkən, hüquq mühafizəçiləri qadının üzərində işığı əks etdirən jilet olduğunu qeyd ediblər, amma bu da onu vurulmaqdan xilas etməyib.

Düz bir ay sonra, martın 27-də axşam saatlarında Bakı Beynəlxalq Hava Limanına gedən yolun bir hissəsində yerləşən körpüdə hərəkət edən yük maşınının açılan qapısı dəyən 1965-ci il təvəllüdlü Mİİ əməkdaşı Cəmilə Salahova yerindəcə həlak olub. Növbəti, sayca yeddinci avtomobil qəzası qurbanı ötən bazar günü, avqustun 12-də metronun "Memar Əcəmi" stansiyası yaxınlığında yolda tapılmış süpürgəçi qadın olub.

Əvvəlki illərin statistikası göstərir ki, Bakıda hər il qurbanı yerli kommunal xidmətlərin əməkdaşları olan orta hesabla 5-7 YNH qeydə alınır. Amma ən az bunun qədər təəccüblü bir fakt da var, hələ 2013-cü ildə Bakı şəhər İcra Hakimiyyəti Dünya Bakı tərəfindən verilmiş kreditlə yeni zibilyığan texnika almağı planlaşdırırdı. Amma nədənsə sövdələşmə baş tutmadı. Ya pul mayın 10-da növbəti təmtəraqlı gül bayramının təşkil edilməsinə, ya başqa nəyəsə xərcləndi, amma şəhərin kommunal xidmətləri yeni texnikaya qovuşmadı. Turan-ın müxbirinin bu faktla bağlı açıqlama almaq cəhdləri uğursuz oldu, belə ki, Bakı şəhər İH nümayəndələri idarənin mətbuat xidmətinin icazəsi olmadan şərh verməkdən imtina edirdilər.

İctimai rəyin basqısı altında şəhər hakimiyyəti süpürgəçi qadınları günün qaranlıq saatlarında sürücülərin uzaqdan görməsi üçün fosforlu xüsusi jiletlərlə təmin etmək qərarına gəldi. Məsələn, aprelin əvvəllərində Suraxanı rayon icra hakimiyyətinin binasında DİN rəhbərliyinin sifarişi ilə paytaxt küçələrinin təmizliyinə görə məsuliyyət daşıyan kommunal xidmət işçiləri üçün hazırlanmış yeni xüsusi geyim təqdim edildi. Tədbirin təntənəli hissəsindən sonra yeni xüsusi geyim kommunal xidmətlərin əməkçi qadınlarına təqdim edildi.

Bəs sonra? Süpürgəçilər maşınların təkərləri altında həlak olmağa davam etdilər, çünki onlar öz işlərini səhər tezdən, hava işıqlı olarkən yerinə yetirirdilər və işıq əks etdirən jiletlərə ehtiyacları yox idi.

Hökumət, nəhayət ki, xüsusi kommunal texnika almaq səxavətinə gəldilər. Bundan sonra paytaxt yollarında vəziyyət dəyişəcək? Tıxaclar, yol işarələri, maşın vurmasın deyə yolun kənarına sıxışan uniformalı qadınlar? Görərik.