Bakıda Söyüdlü sakinlərinin problemləri ilə bağlı dinləmələr keçirilib

Bakı/27.06.23/Turan: İyunun 27-də Bakıda Söyüdlü İşçi Qrupunun təşkil etdiyi ictimai dinləmələr keçirilib.

İşçi qrupunun həmtəsisçisi Afiyəddin Məmmədov bildirib ki, ictimai dinləmələrin məqsədi Söyüdlü camaatına məsələnin gündəmdə olduğunu, onlara hüquqi dəstək göstərməyə çalışdığımızı çatdırmaqdır. "Digər tərəfdən ictimaiyyət bilməlidir ki, məsələ bitməyib, Söyüdlü hələ də blokadadır, sakinlərə hədə-qorxu gəlinir və onun nəticəsində onlar ünsiyyətdən çəkinirlər. Onlara hüquqi yardım göstərmək lazımdır".

Müzakirələrin iştirakçıları bildirib ki, kənd blokadada olduğu üçün oraya getmək və vəziyyətin monitorinqini apatmaq mümkün deyil və orada həbs olunanların sayı ilə bağlı artıq məlumat almaq mümkünsüzdür. "Həmçinin onlara hüquqi yardım göstərmək çətinləşib, çünki kənddə yaşamayanlar üçün giriş bağlıdır və hətta kənd sakinləri üçün çıxış da, demək olar ki, qadağan olunub. Onlar nə apellyasiya şikayətini verə bilir, nə də hüquqi yardım ala bilir".

Dinləmələrdə iştirak edənlər vəziyyətdən çıxış yollarını və gələcəkdə bu cür hadisələr baş verərsə, onlara operativ reaksiyanın necə olmasını da müzakirə edib.

Söyüdlü İşçi Qrupu iyunun 21-də yaradılıb və onun məqsədi hadisələr zamanı saxlanılanlara və həbs olunanlara hüquqi yardım göstərilməsidir. Qrupda bir neçə hüquqşünas və vəkil yer alır. 0