Bayram Məmmədov işgəncəyə məruz qaldığını bildirir və ekspertizanın təyin edilməsini istəyir

Bakı/04.04.19/Turan: Vəkil Elçin Sadıqov, nəhayət, Binəqədi təcridxanasında NİDA Hərəkatının üzvü, 30 sutka həbs cəzası almış Bayram Məmmədov ilə görüşə bilib.

Vəkilin sözlərinə görə, o, ombudsman aparatına müraciət etdikdən sonra görüş verilib.

Vəkil deyib ki, B.Məmmədovun işgəncələrlə bağlı şikayətindən sonra o, baş prokuror, onun birinci müavini, Bakı şəhər prokuroru, Binəqədi rayon prokuroru və DİN rəhbərinə müraciət edib.

"Bayram Məmmədov işgəncəyə məruz qalması barədə izahat yazıb və ekspertizadan keçirilməsini istəyir", - vəkil bildirib.

Jurnalist Xədicə İsmayılova B.Məmmədovun yaralarının qrafik təsvirini dərc edib. Bunu B.Məmmədov özü kağız üzərində çəkib, bayırdakılara ötürüb. Şəkildə onun bədəninə (baş, burun, qulaq, diz və s.) yetirilən xəsarətlər təsvir edilib.

*Qiyas İbrahimov və Bayram Məmmədov 2016-cı ilin mayında Heydər Əliyevin abidəsi üzərinə siyasi şüarlar yazdıqdan sonra həbs olunmuşdular. Onlar külli miqdarda narkotik maddənin qanunsuz dövriyyəsində ittiham olunaraq 10 il azadlıqdan məhrum edilmişdilər. Martın 16-da əfv sərəncamı ilə azadlığa çıxıblar. Martın 30-da B.Məmmədov inzibati qaydada 30 sutka həbs edilib.-21C--